ஆத்தா நா பாசாயிட்டேன்

அட என் பதிவும் தமிழ்மணம் லிஸ்டுல இருக்குதுங்க. பச்சை விளக்கு பிரகாசமாய் எரியுது. ஆனா, சில சந்தேகங்கள் மண்டையைக் குடையுது. தனிமனித சுதந்திரம், என் கொள்கை மற்றவர்களை பாதிக்காத வரையில்தான் என்பதில் எனக்கு முழு உடன்பாடு. பத்மா சொல்வதும் சரியாய் இருக்கிறது. ப.வி.ஸ்ரீரங்கன் எடுத்து சொல்வதை மறுக்கமுடியாது. முழு சுதந்திரம் இல்லாத இடத்தில், கட்டுப்பாடுகள் கொண்ட இடத்தில் என்னாலும் இருக்க முடியாது.

ஆனால் சுயகட்டுப்பாடுகள் மனிதனுக்கு அவசியம் என்பது பத்மாவின் எழுத்தில் புரிகிறது. ஆனால் அப்படி இல்லாத பொழுது, ராகவன் அவர்கள் சொல்வதைப் போல கருத்து சுதந்திரம் தானே மனிதன் அறிதலுக்கு முழு காரணம்!
இணைய தொடர்ப்பு ஏற்பட்டவுடன், என் கருத்துக்கள் எண்ணங்கள் இவற்றில் பல மாற்றங்கள். நான் இதுவரை நினைத்திருந்த பல விஷயங்களில் எதிர்மறை கருத்தாளர்கள் எடுத்து சொன்னதில் என்னுள் பல மாற்றங்கள். பல விஷயங்கள் யோசிக்க வைத்துள்ளன.

ஆனால் அதே சமயம், சொல்வதில் நாகரீகம் வேண்டும் என்பதை நாம் எல்லாருமே சொல்லிக் கொண்டு இருக்கிறோம்.
இணையத்தில் மிகப் பெரிய குறை, சமூகத்தில் பெரியவர், நல்லவர், அறிஞர், நல்ல நட்பு என்று நாம் நினைத்துக் கொண்டுருப்பவர் கூட போலி பெயரில் வந்து எதை வேண்டுமானாலும் உமிழ்ந்து விட்டுப் போகலாம். ஆனால் அதையும் கண்டுப் பிடிக்கும் தொழிற்நுட்பம் வரும் என்று நம்புகிறேன். அன்று பலரின் முகத்திரை கிழியும். அந்த நாளை ஆவலுடன் எதிர்பார்க்கிறேன்.

காசியின் உழைப்பு பாராட்ட வேண்டிய ஒன்று என்பதில் எந்த சந்தேகமும் இல்லை. தமிழ்மணம் என்றாலே காசி என்று பெயர் வாங்கிவிட்டார். இதை யாரும் மறுக்க மாட்டார்கள். ஆனாலும் தன்னிச்சையாய் அவர் எடுத்த இந்த முடிவுகள் பல சந்தேகங்களையும், குழப்பங்களையும், என்னைப் போன்று வெளியில் இருந்து வேடிக்கைப் பார்ப்பவர்களுக்கு பல கேள்விகளையும் ஏற்படுத்துகின்றன.

ஒருவர் மதத்தின் நம்பிக்கையை இன்னொருவர் கேலி செய்து பரஸ்பரம் இட்டுக் கொண்ட பதிவுகளைக் கூட வெகு சிலரைத் தவிர மற்றவர்கள் கண்டுக் கொள்ளவில்லை. அதில் தாக்கி பின்னூட்டம் இட்டவர்கள் கூட வெகு சிலரே. அப்படி இருக்க, அருணின் பதிவு ஏன் நீக்கப்பட்டது? சிவகுமார் விலகும் அளவு என்ன நடந்தது? இணையகுசும்பன் என்ன அப்படி எழுதினார்? ஒண்ணுமே புரியலைங்க!

பி.கு குஷ்பூக்கு அடுத்து இந்த மேட்டர் எத்தனை நாளுக்கு ஓடும்?