ஒரு எழுத்துக்காரி தோட்டக்காரி ஆன கதை!

இவ்வாறாக என்னுடைய தோட்ட முயற்சிகள் எல்லாம் சொல்லும்படி இல்லாமல் போனது. நன்கு பூத்த மல்லிகை வாடிப் போனது. கீரைகள் ஏனோ தானோ என்று இருந்தது. அந்நேரம் தமிழக வேளாண் கழகத்தில் ஒரு நாள்  வீட்டு/ மாடி தோட்ட வகுப்பு நடக்கும் விளம்பரம் கண்டு அதில் சேர்ந்தேன். பல விஷயங்கள் புரிந்தது. பத்திரிக்கைகள் ,இணையம் இவைகளில் தேடித் தேடி பல விஷயங்கள் கற்றுக் கொண்டேன்.

முதலில் பயந்து அல்லது அனைவரும் பயமுறுத்தியது. தரை ஒழுக ஆரம்பிக்கும் என்று! அப்பொழுது ஒரு இடத்தில் பார்த்த ஐடியா!
இந்த பெயிண்ட் டப்பாக்கள் வாங்கி அதன் மேல் தொட்டியை வைத்தால் தண்ணீர் தேங்காமல் அப்படியே வழிந்து ஓடிவிடும். என்ன இந்த டப்பாக்களுக்கு மிகுந்த டிமாண்டு. பழைய பேப்பர் கடைகள், தெரிந்த பெயிண்டர்களை பிடித்து வாங்கியவைகளிலேயே செடிகளை வைத்துள்ளேன். செங்கல் வேண்டாம் செடிகளில் இருந்து வெளியேறும்  தண்ணீர் ஊறிக் கொள்கிறது

கற்றுகொண்ட பாடங்கள்
தரையில் வளரும் செடிகளை விட தொட்டி செடிகளுக்கு பராமரிப்பு அவசியம். நாமே செய்வதால் உடல் பயிற்சியும் ஆயிற்று.
 நாளுக்கு ஒரு மணி நேர வேலை இருக்கும். தொட்டி மண்ணில் இருக்கும் ஈர பதத்தைப் பார்த்துவிட்டு தண்ணீர் விட வேண்டும். காலை நேரமே தண்ணீர் பாய்ச்ச சரியான பொழுது.  வைட்டமின் டி யும் காலை சூரிய வெளிச்சத்தில் கிடைக்கும் என்பது நமக்கும் நல்ல விஷயம் தானே!

முதலில் நாலைந்து தொட்டிகளில் மண்ணிலேயே செடி  வைத்தேன். அப்பொழுது இந்து நாளிதழில் தேங்காய் நார் கழிவு, மண்ணிற்கு
மாற்று என்ற செய்தி கண்டேன். இது மாற்று என்றாலும் இதில் செடிக்கு தேவையான எந்த சத்தும் கிடையாது. ஒரு பங்கு தே. நா. க, 1/2 பங்கு மண், கொஞ்சம் உரம். உரம் என்பது கடையில் வாங்கும் மண்புழு உரம் மற்றும் என் சொந்த தயாரிப்பு.( இதைப் பற்றி விரிவாகச்
சொல்கிறேன்)

இந்த தே நா.க வில் வைக்கப்படும் செடிகள் அற்புதமாய் வளருகின்றன. முதல் நல்ல விஷயம்- தொட்டி பாரம் இல்லாமல் வெகு லகுவாய் இருப்பதால், இடம் மாற்றுவது மிக செளகரியம். பொதுவாய் பார்த்தால், மண் தொட்டியில் மேல் பக்கம் கொஞ்சம் மஞ்சள் நிறத்தில் மண் காய்ந்து இறுகி இருக்கும். ஆனால் தே. நா.க தொட்டி மண் அப்படி இருப்பதில்லை. பொல பொலவென்று இருக்கிறது. மேலும் ஈர பதம் வெகு நேரம் - இரண்டு நாட்கள் வரை நீடிக்கிறது.

சென்னையில் இரண்டு இடங்களில் தேங்காய் நார் கழிவுகள், செங்கல் போல் இறுக்கப்பட்டு கிடைக்கின்றன. அவைகளை பெரிய வாளி அல்லது டப்பில் தண்ணீர்  ஊற்றி இரண்டு மணி நேரம் ஊற வைத்தால் தண்ணீரை உறிஞ்சிக் கொண்டு பொத பொதவென்று உப்பி மேலே வந்து விடும்.

 

இப்பொழுது கழிவுகளில் இருந்து உரம் தயாரிக்கும் முறை :-)

முதலில் என் தோல்வியைச் சொல்லி விடுகிறேன். வீட்டில் இருக்கும் நிலத்தில் குழி நோண்டி கழிவுகளைப் போட்டு வந்தேன். கொஞ்சம் நாற்றம், ஈ, கொசு தொல்லை பிறகு மழை தண்ணீர் தேங்கி ஓரே அழுகல் நாற்றம். கழிவுகளை மண் புழு தேடி வரும் என்ற எண்ணத்தில் ஆரம்பித்தது எனக்கு சரிப்பட்டு வரவில்லை.

பழைய பிளாஸ்டிக் டிரம்கள் இரண்டு வாங்கி, கீழ் பக்கம்,(8) பக்க வாட்டுகளில், (16) துளைகள் போட்டேன். மேல் மூடியில் கிடையாது.
மழை தண்ணீர் உள்ளே போகக்கூடாது என்பதால்.
,காய்கறி, பழத் தோல்கள் , முட்டை ஓடுகள் - (அக்கம் பக்கம், வூட்டு வேலைக்காரம்மா உபயம்), காய்ந்த இலைகள், சாம்பல், பேப்பர் அட்டைமிஞ்சிய காபி தூள், டீ தூள், (நான் பேப்பர் துணுக்குக்கள் போடுவதில்லை), பூஜை சாமான் கடையில் வாங்கிய வறட்டி (உடைத்துப் போட வேண்டும்). மூடி மேல் கொஞ்சம் வைத்திருக்கிறேன், உங்கள் பார்வைக்கு

எப்படியும் நான்கு மாதம் ஆகின்றன முழுவதும் தயாராக. ஒவ்வொரு முறையும் முற்றிலும் தயாரானது நமக்கே ஆச்சரியமாய் இருக்கும், கலர்கலராய் நாம் போட்டவை எப்படி இப்படி கருப்பாய் ஆகின்றன என்று! இதற்கு கருப்பு தங்கம் என்று பெயராம் :-)
மீந்த சாப்பாடு, எண்ணை பொருட்கள், இவைகளை தவர்க்க வேண்டும்.

கழிவுகள் அழுகத் தொடங்கும்பொழுது, கருப்பாய் லீக் ஆகும், நான் இரண்டு செங்கல் வைத்து, நடுவில் ஒரு தட்டு வைத்திருக்கிறேன்.
லீக் ஆவது அதில் சேகரம் ஆகும், அதையும் செடிக்கு விடலாம்.

ஒரு நோட்டு புத்தகம் போட்டுக் கொள்ளுங்கள். எந்த செடிக்கு என்று உரம் வைத்தீர்கள், பூச்சி மருந்து அடித்தீர்கள் போன்ற குறிப்பும்,
எங்காவது கண்ணில் படும் டிப்ஸ்களை எழுதவும் உதவும்.
டிப்ஸ்,
1- காலை நேரமே தண்ணீர் பாய்ச்ச சரியான நேரம்
2- எறும்பு தொட்டிகளில் காணப்பட்டால் பட்டை பொடி அல்லது டால்கம் பவுடரை தூவுங்கள். ஓடிவிடும்.
3-உரம் தயாரிப்பொழுது ஈ வர ஆரம்பிக்கும். கொஞ்சம் சக்கரையை லிக்விட் சோப் ஒரு ஸ்பூன் கலந்து சின்ன கிண்ணத்தில் உள்ளே
வைத்தால், ஈக்கள் ஓடிவிடும்.
4- வேப்பெண்ணையுடன் லிக்வுட் சோப் கலந்து செடிகளுக்கு அடித்தால், பூச்சிகள் கட்டுப்படும்.
5- உரம் வைத்தப் பிறகு தண்ணீர் ஊற்ற வேண்டும், தண்ணீர் ஊற்றியப்பிறகு பூச்சி மருந்து தெளிக்க வேண்டும்.

இப்பொழுது என் வீட்டில் எழுபதுக்கும் மேலான செடிகள் இருக்கின்றன. கீரைகள் வாங்குவதே இல்லை.வாருங்கள் இயற்கை காய்கறிகளையும், கண்களுக்கு இனிய அழகிய பூக்களை பெறவும் மாடி தோட்டம் போடுவோம்.