நீங்க நான் ராஜாசார்

நம் ஊருக்கு திரும்பியதும் நான் செய்ய நினைத்த வேலைகளில் ஒன்று, ஒரு டிரான்சிஸ்டர் வாங்க வேண்டும் என்பது. வழக்கமாய் தரமான, நியாயமான விலை கடை என்றால் என்னுடைய தேர்வு “விவேக்” தான். சரி வாங்கிடலாம் என்றுப் போனால், டிரான்சிஸ்டர் எல்லாம் வருவதே இல்லை மேடம் என்று வாயால் சொல்லிவிட்டு, எம் பி 3 பிளேயர், ஐபாட் என்று உலகமே முன்னேறிக்கிட்டு இருக்கு, இப்ப போய் டிரான்சிஸ்டராம் என்று கண்ணால் சொல்லி முடித்தான். சைனா மேக் கிடைக்கும் மேடம்என்று அவன் தந்த மேலாதிக்க தகவலை ஓரே வரியில் நிராகித்தேன். நாங்க எல்லாம் சைனா பொருள்களை வாங்குவதில்லை என்றேன் உறுதியுடன். டிரான்சிஸ்டர், டிரான்சிஸ்டர் என்று அலைந்ததில், ஒரு மின்னணு கடையில், சோனி இம்போர்டட் கிடைக்கும் ஆயிரம் ரூபாய் ஆகும்என்றார். அங்கிங்கு சுற்றியதில் ஒன்றும் தேறவில்லை. சரி, அந்த சோனியே வாங்கி தொலைக்கலாம் என்று திரும்ப அந்த கடைக்கு நுழையும்பொழுதும் ஞானோதயம் ஏற்பட்டது, தானிக்கு தீனீக்கு பேர் ஏமி என்று  இத பாருங்க மேடம், நூத்தி முப்பது ரூபாய் சைனா மேக் என்று அழகாய் கையடக்கமாய் காட்டிய ஒன்றை மீண்டும் தேடிப் பிடித்து கொள்கையை எல்லாம் ஏறக்கட்டிவிட்டு, அதே டிரான்சிஸ்டரை எடுத்து வந்தேன். ஆயிற்று, கடந்த ஒரு வருடமாய் இரவு காதோரம் பண்பலை 98.3 ரேடியோ மீர்ச்சியில் “நீங்க நான் ராஜா சார்” கேட்டுக் கொண்டே தான் தூக்கம். மற்ற அலைவரிசைகள் என்ன நிகழ்ச்சிகள் என்றுக்கூட பார்க்க தோன்றுவதில்லை. பதினென் வயதுகளில் மனம் கவர்ந்த பாடல்கள், அதை தாண்டி அன்றைய எம்.எஸவி க்கோ இன்றைய ஹாரீஸ், ரகுமான் இசையிலோ மனம் ஒன்ற மறுக்கிறது. நிகழ்ச்சி நடத்தும் செந்தில் அதீதஆங்கிலமும், அலட்டலும் இல்லாமல் இயல்பான பேசுவது நன்றாக இருக்கிறது. அதே சரவணன் மீனாட்சி ஈரோ! பல அற்புத பாடல்களை இன்று கேட்டும்பொழுது, ராஜா , மலேஷியா வாசுதேவனுக்கு பல அருமையான பாடல்களை பாட வாய்ப்பு தந்திருக்கிறார். போன வாரம் (23-8-2012)நண்டு படத்தில் வரும் “அள்ளி தந்த பூமி அன்னையல்லவா” கேட்டதும் மனசு அப்படியே பின்னோக்கி ஓடியது. இதைவிட அமைதியான , சுகமான தூக்கத்துக்கு மருந்து இருக்கா என்ன? வளையோசை கல கல வென என்று எஸ்பிபி ஆரம்பிக்க, “கொஞ்சம் பெரிசாய் வையேன்” என்று பக்கத்தில் குரல் கேட்டது. அமலா  அந்தகால மனம் கவர்ந்தவ நாயகி, மலரும் நினைவு வந்திருக்கும்  “ராகங்கள் தாளங்கள் நூறு ராஜா உன் பேர் சொல்லும் பாரு” லதா பாட அடிசக்கை பாடல் யாரு நம்ம வாலியாக்கும்  பி.கு இளையராஜா ஸ்பெஷல் வானொலி இணையத்தில் கேட்க http://tunein.com/station/?stationId=166196 இணைப்பு அனுப்பிய பாலராஜன் கீதாவுக்கு நன்றி