சினிமா டிரெயிலர்கள் சொல்லும் வாழ்க்கை தத்துவங்கள்

சின்ன வயசில் நான் பார்த்த திரையரங்குகளில் மெயின் படம் போடுவதற்கு முன்பு "விரைவில் எதிர்பாருங்கள், வருகிறது" என்ற பில்டப்புகளுடன் துண்டு காட்சிகள் போடுவார்கள். ஐந்து நிமிடத்தில் காட்சிகள் சட் சட் என்று மாறும். நன்றாக விறுவிறுப்பாய் இருக்கும். ஆஹா, என்ன அருமையான படம் என்று அனைவரையும் நினைக்க வைக்கும் அளவிற்கு பாராட்டும் மனதை ஓரிஜினல் படத்தைப் பார்த்ததும், சில சமயங்களில் டிரெயிலரில் பார்த்த படமா என்று குழப்பத்தையே உண்டு பண்ணிவிடும். அவ்வளவு திராபையாய் இருக்கும். என்னத்தான் சொல்லுங்கள், இப்படி சூப்பராய் டிரெயிலர் எடுப்பதுக்கும் திறமை வேண்டும்.

பிறகு விசிஆர், டிவிடி ப்ளேயர் என வீட்டிக்கு வந்ததும் வாங்கும் ஓரிஜனல் கேசட், டிவிடியிலும், பெரும்பாலும் ஆங்கில படங்களில் வரப் போகும் படங்களின் டிரெயிலர் கட்டாயம் இருக்கும், ஏதோ ஒன்றிரண்டை எழுதி வைத்துக் கொண்டு, பிறகு தேடி பிடித்து நொந்துப் போனதும் உண்டு. இந்த "டிரெயிலரைக் கண்டு ஏமாறாதே "என்ற தத்துவம் அனைவருக்கும் தெரிந்தது என்றாலும், தெரிந்தே ஏமாந்துதான் போகிறோம்.

வாழ்க்கையும், மெயின் பிக்சர், டிரெயிலர் மாதிரிதான் என்று எங்கோ படித்தது நினைவுக்கு வருகிறது. நம் பாபாவும் அதைதானே சொன்னார்.

காதலிக்கும் போது அல்லது கல்யாணம் நிச்சயம் ஆன அந்த சில நாட்களில், வாரங்களில் வருடங்களில் வாழ்க்கை எவ்வளவு அழகாய், விறுவிறுப்பாய், அற்புதமாய், சுவாரசியமாய் இருந்தது. ஆனால் கல்யாணம் ஆனதும்???? டிரெயிலரில் பார்க்கும் அதே காட்சிகள், அதே
நடிக நடிகைகள், ஆனால் மெயில் பிக்சர் ஏன் சுவையாய் இல்லை? வாழ்க்கையும் அப்படிதானே, நாம் மாய்ந்து மாய்ந்து காதலித்த ஆளா இது என்று நொந்துப் போவது ஏன்?

காதலிக்கும்போது கிடைத்த துணையை நினைத்து, நாம் அல்லவா மேட் பார் ஈச் அதர் ஜோடி, அன்பு என்றால் இதெல்லவா அன்பு, ஒவ்வொரு வார்த்தையிலும் பொங்கி வழியும் காதல், ஏழேழு ஜன்மங்களுக்கும் தொடரும் பந்தம் என்றெல்லாம் நினைத்து நினைத்து பூரித்துப் போகும் வாழ்க்கை, மெயின் பிக்சர் அதாவது கல்யாண வாழ்க்கை தொடங்கியதும் பல் இளித்துப் போகிறது.

டிரெயிலரை, அதாவது காதல் வசப்படும் நாட்களில் வீசும் வசந்தம், வாழ்க்கை முழுவதும் தொடரும் என்று நினைத்து யாரும் ஏமாந்துவிடாதீர்கள்.

நாங்கள் அப்படி எல்லாம் இல்லை, காதலிக்கும்போது இருந்த அதே மனோபாவத்துடம் வருடம் பல கடந்தும் வாழ்கிறோம் என்று நீங்கள் சொன்னால், எங்கோயோ சில படங்கள்- டிரெயிலர் போலவோ அல்லது டிரெய்லரை விடவும் வாழ்க்கையும் சுவையாய் அமைந்துவிடுகிறது என்று ஒத்துக் கொள்கிறேன்.