10/6/2005

தாமதமாய் ஒரு பிறந்தநாள் நினைவுகள். காலையில் குமரனின் இரண்டு வருடம் ஆயிற்று என்ற பதிவைப் பார்த்ததும், அட நாமும் இந்த மாதம்தானே ஆரம்பித்தோம் என்று நினைவு வந்தது. ஒரு திருத்தம் அதற்கு முன்பு அந்த மே மாதம் ஆரம்பித்து, பின்பு ஆகஸ்டில் மூடு விழா செய்துவிட்டேன். மாடரேஷன் இல்லாததால் வந்த பிரச்சனையை எதிர் கொள்ள முடியவில்லை.

அதற்கு முன்பு "தோழியர்" கூட்டு வலைப்பதிவில் எழுதிக் கொண்டு இருந்தேன். அதுக்கும் முன்பு ஒன்லி பின்னுட்டம். அதிலும் யூனிகோர்டில் போட தெரியாமல், கல்வெட்டு கணக்காய் எழுத்தால் உருமாறி, பதிவாளர்களை கடுப்பேற்றியது ஒரு கதை. ஆளுஆளுக்கு டியூஷன் எடுத்து தட்டு தடுமாறி பின்னுட்டம் போட கற்றுக் கொண்டேன். பிளாக் ஆரம்பிக்கவில்லையா என்று நாலு நல்ல உள்ளங்கள் கேட்க, நட்புக்களை பிடிங்கி எடுத்து "நுனிப்புல்" ஆரம்பித்து நடுவில் நிறுத்தி பிறகு அக்டோபர், 2005ல் இருந்து தொடர்ந்து ஓடிக்கொண்டு இருக்கிறது.

எழுத விரும்புபவர்களுக்கு வலைப்பதிவுகள் ஒரு வரப்பிரசாதம் என்பது மிகையில்லை. அருமையான நட்புகள், அழகான கருத்து மோதல்கள் மட்டுமில்லாமல், மனதிற்கு இனிய தனிப்பட்ட நட்பு வளையம் என்று வாழ்க்கை இனிமையாய் போய் கொண்டு இருக்கிறது.

பிரச்சனைகள் இங்கும் இருக்கத்தான் செய்கிறது, ஆனால் பிரச்சனை இல்லாத இடம்தான் எது? எதிர்வினைகள், கருத்து மோதல்களாய், அதாவது கருத்துக்கு மட்டும் மாற்று கருத்து சொல்வது போய் தனிப்பட்ட தாக்குதல் செய்யும்பொழுது மனம் அலுத்து போகிறது. இதனாலேயே பின்னுட்டம் இடுவதில் ஆர்வம் குறைந்துவிட்டது. ஆனால் பதிவு நன்றாக இருந்தால், அதிலும் புதியவர்கள் என்றால் ஒரு பின்னுட்டம் இடுவதை வழக்கமாய் கொண்டு உள்ளேன்.

ஆரம்ப காலங்களில் சில சமயங்களில் மனம் சலித்துப் போனதை ஒத்துக் கொள்கிறேன். ஆனால் ஏன் யாரோ ஏதோ சொன்னால், நாம் ஏன் எழுதுவதை நிறுத்த வேண்டும் என்ற கேள்வி தோன்றி, இப்பொழுது எல்லாம் இந்த கேள்வியே எழுவதில்லை :-) எழுத முரசு எடிட்டரோ, உழுவதற்கு ஈ கலப்பை கிடைத்ததும், நம் எழுத்தையும் நாலு பேர்கள் படிக்கிறார்கள், விமர்சிக்கிறார்கள் என்ற பரபரப்பு தந்த புது மோகம் வடிந்துவிட்டது. எழுதுவது ஒரு பழக்கமாய் மாறிவிட்டது.

பிளாக் ஆரம்பித்ததில் கற்றதும், பெற்றதும் மிக அதிகம். எழுத்தாளராக என்னை நிலைநிறுத்த பயிற்சிக்களமாகவும், குறைநிறைகளை சுட்டிக்காட்டப்படும் தளமாகவும் பிளாக் விளங்குகிறது. புது புது விஷயங்கள், இது நாள்வரையில் என் கருத்து என்று நினைத்துக் கொண்டிருந்ததை, மாற்றி புது எண்ணங்களை விதைத்தவை மிக அதிகம். திருத்திக் கொண்ட தவறுகளும் உண்டு.

தமிழகம் போகிறேன் என்றால், சினேகிதிகளை பார்ப்பது கட்டாயம் உண்டு. . இம்முறை சென்னையில் இருந்தது முன்றே நாள் - அதில் ஒருநாள் பந்த்- திடீர்பயணம் என்பதால் பொதுவில் சொல்ல முடியவில்லை. இம்முறை புதுமுகங்களாய் லஷ்மியும், வல்லியும் வந்திருந்தனர். அடுத்த முறை டெல்பின் மேடத்தைக் கூப்பிட வேண்டும். கீதா, பொன்ஸ் ஊரில் இல்லை. இன்னும் யார் யார் என்று தெரியவில்லை. அது என்ன பெண்கள் மட்டும் என்றுக் கேட்காதீர்கள். வலைப்பதிவர் மாநாடு என்றெல்லாம் இல்லாமல், இஷ்டத்துக்கு பேசிக் கொண்டு இருப்போம். எந்த தயக்கமும் இன்றி- இது மிக முக்கியம் இல்லையா :-))))

இந்த பதிவில் மட்டும் அனானிமஸ், மற்றும் அதர் ஆப்ஷனை அனுமதிக்கலாம் என்று இருக்கிறேன். நுனிப்புல் சம்மந்தமாய் உங்கள் கருத்துக்களை, விமர்சனங்களை எழுதுங்கள். ஆக்கப்பூர்வமாய் எழுத்து, படைப்பு சம்மந்தமான எதிர் வினைகளையும் எதிர்ப்பார்க்கிறேன்.
பதிவுக்கு சம்மந்தமில்லாத விஷயங்கள், தாக்குதல்கள், கும்மிகள் தயவுசெய்து வேண்டாம்.இதைத் தூக்கியாச்சு