எலுமிச்சை பழ சாதம்- ஒரு விழிப்புணர்வு பதிவு

வெகு நாட்களாய் என் மனதில் ஒரு கேள்வி, இவ்வளவு எழுதுகிறாயே, சமுதாயத்துக்கு பயன் அளிக்கும்படி, ஒரு விழிப்புணர்வு கட்டுரை எழுதக்கூடாதா என்று? சரி இன்று எழுதிவிடலாம் என்று களத்தில் இறங்கிவிட்டேன்.

பொதுவாய் பிரச்சனைகள் எங்கிருந்து, எந்த பக்கத்தில் இருந்து, எந்த ரூபத்தில் வரும் என்று சொல்லவே முடியாது. ஒவ்வொரு முறையும் பிரச்சனையின் தாக்கத்தில் மனம் உடைந்துப் போகிறோம். நம் மன உளச்சலுக்கு வெகு சுலபமாய் பிறர் மீது பழிப் போட்டுவிடுகிறோம். ஆனால் கொஞ்சம் யோசித்துப் பார்த்தால், ஏதாவது ஒருவகையில் நம்முடைய கைங்கரியங்கள் அதில் கட்டாயம் இருக்கும். சதவீதங்கள் கூட, குறைவாக இருக்குமே தவிர, பெரும்பாலும் வாய் வார்த்தைகளால் அல்லது செய்கைகளால் நாமும் ஏதாவது செய்து வைத்து இருப்போம். என்ன ஒன்று ஒத்துக் கொள்ளத்தான் மனம் ஒப்ப மறுக்கும். வேற என்ன வேலியில் போகும் ஓணானை மடியில் விட்டுக் கொண்டு, பிறகு குத்துதே குடையுதே என்று கூவுவது மாதிரிதான்.

சரி, தலைப்புக்கு வருகிறேன். என் பிள்ளைகளுக்கு எலுமிச்சை பழ சாதம் மிகப்பிடிக்கும். தேங்காய் துருவி போட்டு. முந்திரி பருப்பு வறுத்துப் போட்டு அவ்வப் பொழுது மதிய சாப்பாடுக்கு செய்வேன். பிரச்சனை என்னவென்றால், இந்த சாதம் செய்யும் நாள் எல்லாம், மதியம் என்னால் சாப்பிட இயலாமல் போய்விடும். சாப்பாட்டை பார்த்தால் வயிறு புரட்டும். சரியாய் சாப்பிட முடியாமல் மந்தமாய் இருக்கும். மணியாக ஆக, தலைவலியும் வரும். விரதம், பட்டினி இதெல்லாம் எனக்கு பழக்கமில்லை. சரியான நேரத்தில் சாப்பிட்டு பழகிவிட்டதால், சாப்பிடாவிட்டால் தலைவலி வரும். ஒவ்வொரு எலுமிச்சை சாதம் செய்யும் நாளிலும் இந்த பிரச்சனை வந்தது. ஏதோ அலர்ஜி போல் இருக்கு என்று செய்வதையே விட்டு விட்டேன்.

போன வருட விடுமுறையில், உறவினர் வீட்டு விசேஷத்தில், இலையில் எ.பழ சாதத்தை வைத்ததும் அலறினேன், எனக்கு அலர்ஜி என்று! எல்லாருக்கும் ஆச்சரியம், எலுமிச்சை பழம் அலர்ஜி என்றுக் கேட்டதே இல்லையே என்றார்கள். என்னுடைய உறவினர் ஒருவருக்கும் இயற்கை வைத்திய முறையில் ஆர்வமுண்டு. தோண்டி துருவி கேட்டார். பழசாறு குடிக்கிறேன், பாட்டில் பாட்டிலாய் எலுமிச்சை பழ ஊறுகாய் தின்கிறேன் என்றால் பிரச்சனை எ. பழ சாதத்தில் இல்லை என்றவர், என்னை அன்று எ.பழ சாதத்தைச் சாப்பிட சொன்னார். நானும் சாப்பிட்டேன். ஆனால் தலைவலி எதுவும் வரவில்லை. சொந்தக்காரர்கள் மத்தியில் ஏதோ அலட்டுகிறேன் என்ற பெயர் வந்ததுதான் மிச்சம்.

ஊரில் இருந்து அப்பொழுது இருந்த அமீரகம் வந்ததும், ஒரு நாள் எலுமிச்சை சாதம் செய்யலாம் என்று ஆரம்பித்ததும், மண்டையில் அடித்ததுப் போல நான் இது நாள் வரை செய்ய வில்லங்கம் புரிந்தது. வேறு என்ன, நல்ல முற்றிய அருமையான தேங்காயில் நாலு பத்தை, நல்ல குண்டு குண்டு முந்திரி பருப்புகள் ஒரு கைப்பிடி என்று பன்னிரண்டு மணி வாக்கில் வாயில் போட்டு அரைத்தால், பிறகு சாப்பாடு இறங்குமா? இது தெரியாமல், எ.பழ சாதம் எனக்கு அலர்ஜி என்றுச் சொல்லிக் கொண்டு இருந்தேன்.பாவம் பழியை அதன் மீதுப் போட்டேன்.

ஆக, மெசேஜ் என்னவென்றால் தீதும் நன்றும் பிறர் தர வாரா.