முதலியார் சமூக தமிழும், சென்னை தமிழும்

யோகன் அவர்களின் இந்த பதிவைத் தொடர்ந்து
சென்னையில் என் சிறுவயதில் அக்கம்பக்கம் முழுவதும் முதலியார் சமூகத்தினர். ஆற்காட்டு முதலியார் என்ற உட்பிரிவு என்று நினைக்கிறேன்அப்பொழுது எல்லாம் எழுதுவேன் அல்லது பிளாக்கிலாவது பினாத்துவேன் என்று தெரியாததால் நினைவில் இருப்பதை சொல்கிறேன். அப்பாலிக்கா வரேன்- பிறகு வருகிறேன், இப்ப இன்னாங்கரே - இப்பொழுது என்ன சொல்கிறாய், இட்டா- அழைத்துவா, வலிச்சிக்கீனுவா- இழுத்து வருதல், தாராந்து பூட்ச்சு -காணாமல் போய்விட்டது, ஆயா- பாட்டி போன்ற செந்தமிழ் வாக்கியங்கள் மனப்பாடமானது. இவை எல்லாம் வெறும் ரிக்ஷாகாரகள் அல்லது சென்னை சேரி தமிழ் என்று நினைக்க வேண்டாம். இதுவும் வட்டார மொழியே.

ஜெயகாந்தன் தன் பல கதைகளில் இந்த ஸ்லாங்கை கையாண்டு இருப்பார். அவரின் "ஒரு நடிகை நாடகம் பார்க்கிறாள்" படத்தில் தேங்காய் சீனிவாசனும், ஸ்ரீகாந்தும் என்னமாய் முதலியார் தமிழ் பேசுவார்கள்! வேறு எந்த வட்டாரத்திலும் பாவிக்காத சொல் சித்தி அல்லது சின்னமாவுக்கு "தொத்தா".

அடுத்து சபாபதி என்ற திரைப் படம். நாற்பதுகளில் வெளியானது. கதை வசனம் பம்மல் சம்பந்த முதலியார். அதிலும் சென்னை தமிழ் போன்ற முதலியார்களின் பேச்சு வழக்குகள். பம்மல் K சம்மந்தம் என்ற பெயரில் நம்ம கமல், அனுபவித்து சென்னை தமிழ் பேசி
நடித்த படம். அதில் பம்மலில் வசிக்கும் கமலின் சொந்த பந்தங்கள், வயசான தாத்தா பாட்டி உட்பட பேசும் தமிழை கவனித்தீர்களா? அதுதாங்க முதலியார் தமிழ்.

முதலியார்கள் மட்டுமல்ல, சென்னையில் பிறந்து வளர்ந்தவர்கள் பேச்சு இப்படித்தான் இருக்கும். நீங்க சென்னையா என்று பேச ஆரம்பித்த உடனே கண்டுப்பிடித்துவிடுவேனாக்கும். கல்யாணம் ஆன புதியதில் அஸ்ஸாமில் இருந்தப்பொழுது சென்னைவாசிகளுடன் பேசும் என் தமிழைக் கண்டு என் கணவர் பயந்துப் போனார். ஆனால் என் செய்வது? தே மதுர தமிழ் ஓசை காதுக்கு இனிமை என்றாலும், அவரவர் பேச்சு வழக்கில் பேசுவது காதில் விழுந்தால் அது அல்லவா இன்னும் கொஞ்சம் அதிக மகிழ்ச்சியைக் கொடுக்கிறது :-)