கனிமொழி

பிரச்சனைகள் என்று வரும்பொழுது பிறரைக் குற்றம் சாட்டுவது மிக சுலபம். ஆனால் நம் பக்கமும் உள்ளவைகளை சுலபமாய் மறந்துவிடுகிறோம். நம் பக்கத்து குறைகளை கேலி செய்வது தேவையில்லை, ஆனால் குறைகளை சுட்டிக்காட்டலாமே? இது அனைத்துப் பிரச்சனைகளுக்கும் பொதுவான கருத்து.

நேற்று "தோழி டாட் காம்" பார்த்தேன். கருணாநிதி அவர்களின் மகளான கனிமொழி நடத்துகிறார் என்ற ஒரு விவரமும் தெரியும்.

அதில் http://www.thozhi.com/vivatham.php விவாதம் என்ற தலைப்பில் கவிதா என்பவர் அரசியலில் பெண்களை இழிவாகப் பேசிவதை கண்டித்து எழுதியுள்ளார். படித்துப் பாருங்கள். சமீபத்து திமுக மாநாட்டில் முன்னாள் பெண் அமைச்சர் ஒருவர், ஜெயலலிதா அவர்களை தரக்குறைவாய் பேசியதை பதிவு செய்துள்ளார்.

இது இந்த கட்சி அந்த கட்சி என்றில்லை. எல்லா கட்சியிலும், எல்லா மட்டத்திலும் அரசியலில் ஈடுப்படும் பெண்களை, அரசியல்வாதிகளின் வீட்டு பெண்களை வாய்க்கு வந்தப்படி தரக்குறைவாய் பேசுவது வழி வழியாய் வந்த வழிதான்!

அதிலும் ஒரு நடிகை மேடை ஏறினால் போதும், அது ஜெயலலிதாவானாலும் சரி, ராதிகா, குஷ்பூவானாலும் சரி அவர்களின் ஒழுக்கமே முதலில் எள்ளி நகையாடப்படும்.

ஒரு கட்சி தலைவரின் மகளான ஒருவர், தான் நடத்தும் இணைய தளத்தில் எதிர்கட்சி தலைவியை அநாகரீகமாய் விமர்சிப்பது தவறு என்று சொல்ல அனுமதித்த கனிமொழி அவர்களின் பண்பட்ட பார்வைக்கு வாழ்த்துக்கள். இத்தகைய இளைய சமூகத்தால் அரசியலும் நாகரீகம் பெறும் என்ற நம்பிக்கையும் வருகிறது.

அப்படியே ஒரு பெண்ணின் தலைமையில் இயங்கும் அதிமுகவினரின் இத்தகைய தரக்குறைவான பேச்சுக்களையும் ஜெயலலிதா அவர்கள் தடுக்க வேண்டும் என்ற கோரிக்கையையும் இங்கு வைக்கிறேன் ( ஆமா, இதை யாரு பார்க்கப் போறாங்க என்று கேட்காதீங்க)