குதிரே... குதிரே

எவ்வளவு நாட்கள் முதலைப் படத்தைப் பார்த்துக் கொண்டு இருப்பீர்கள்? இதோ குதிரை படம். இது கையால் நெய்யப்பட்டு ஆப்கானிஸ்தானில் தயாராகும் கம்பளம் வகையறா, ஆனால் சுவரில் மாட்டக்கூடியது. இதைப் பார்த்தவுடன், மிக ஆசைப்பட்டு உடனே வாங்கியது. என் கணவரும் உடனே வாங்க ஒத்துக் கொண்டது , உலகமகா அதிசயம்!

நீளம் நாலடி, அகலம் ஐந்தடி இருக்கு. கம்பளி நூலால், கையால் இத்தனை தத்ரூபமாய் நெய்திருக்கிறார்கள். குதிரைகளின் காலடியில் சிதறும் தண்ணீர் துளிகள், தூரத்து காட்டு மரங்கள், சிலிர்க்கும் குதிரைகளின் பிடரி முடி, அதன் கண்கள் என்றுப் பார்க்க, பார்க்க
அழகுதான். இந்த அழகை நான் ரசிக்க மூலக்காரணம் ஆப்கானிஸ்தானத்தின் சிறு பிள்ளைகளின் உழைப்பு. மெல்லிய பிஞ்சு விரல்களால்தான் நுண்ணிய முடிச்சுக்கள் போட முடியுமாம்.

இன்னும் ஒரு பீஸ், இது சிறியது. அகலம் நாலடி, நீளம் ஒன்றரை அடி. இது அரபு பாரம்பரியத்தைக் காட்டுகிறது. சின்ன சின்ன விஷயங்கள், எவ்வளவு நுணுக்கமாய் காட்டியிருக்கிறார்கள், பாருங்கள்.


பிடித்த விலங்கு என்னவென்று கேட்டால், குரங்கு என்று சொல்லும் குரங்கு புத்தி. ஆனால் கவர்ந்த விலங்கு என்றால் குதிரைதான். மோகம் என்றுக்கூட சொல்லலாம். சிறுவயதில் டி.டியில் பார்த்த பழைய எம்.ஜி.ஆர் படங்களோ, வாசித்த பல சரித்திர நாயகர்கள் குதிரையில்
டக், டக், டக் என்று பயணித்து மனதை கவர்ந்தார்களோ தெரியவில்லை.

கல்கியின் குதிரையுடன் பேசும் வந்தியதேவன், வாதாபி நோக்கி பயணித்த பரஞ்சோதி, எம்.கே. முன்ஷியின் ஜெய் சோமநாத்தில் பத்மடி பெண்ணே என்று தன் குதிரையைக் கொஞ்சும் ராஜபுத்திரன், சாண்டில்யனின் குதிரை வியாபாரம் செய்ய வரும் யவனர்கள் ... இன்னும்
எவ்வலவு சொல்ல?

கடற்கரையில் மணலில் ஓடும் குதிரைகள் போஸ்டர், நல்ல பித்தளையில் செய்த காலைதூக்கிக் கொண்டு நிற்கும் குதிரை என்று தேடி வாங்காமல், வீட்டில் குதிரைகள் அங்கங்கு கண்ணில் படும். சேணம் போடாத குதிரைகளே அழகு.

ஒரு நாள் துபாய் வீதியில் அரபு குதிரை ஒன்றைப் பார்த்ததும், மோகம் முற்றிப் போனது. தெருவில் நடந்துச் சென்ற கண்கள் மட்டுமல்லாது சாலையில் போகும் கார்கள் கூட நின்று திரும்பி பார்க்கும்படி அதன் கம்மீரம் இருந்தது.

பிறகு அடுத்து வந்தது Horse whisperer நாவல்., Nicholas Evans எழுதியது. கதையின் களம் முழுக்க முழுக்க குதிரை, குதிரைதான். இந்த நாவலை முதலில் சிறந்த காதல்கதை என்றே நினைத்திருந்தேன். பிறகு அந்நினைப்பு அம்மா, மகளின் உறவின் மேன்மை சொல்வதுப்
போலவும் மாறிப் போனது. இக்கதையை படமாய் எடுத்திருக்கிறார்கள் என்ற செய்தி தெரிந்தாலும், பார்க்க பயமாய் இருந்தது. எப்படி மாற்றி இருப்பார்களோ என்று?

சிலவாரங்களுக்கு முன்பு, தொலைக்காட்சியில் இரவு, சானல்களை மாற்றிக் கொண்டு இருக்கும்பொழுது இந்த படம்! தவிர்க்க இயலாமல் பார்த்தேன். கதையில் இருந்த ஜீவன் படத்தில் இல்லை. உப்பு சப்பு இல்லாமல் இருந்தது. படத்தின் முடிவில் நாயகியின் இரண்டாவது
காதலையும் பண்பாடு (!) கருதி மாற்றிவிட்டார்கள். படத்தில் குதிரை அருமையாய் நடித்துள்ளது. நாயகன் வேடத்தில் ஒரு அரை கிழவனைப் போட்டு, கதையின் அழகைக் கெடுத்துவிட்டார்கள். மகள் மற்றும் தாயின் நடிப்பும் பரவாயில்லை.

குதிரைக்கதைகள் போதுமா?