தொலைக்காட்சி, இணையம், ஆனந்தவிகடன் கல்கி- போட்டு தாக்கு

சன் டீவி டாப் டென்னில் வல்லவனுக்கே முதல் இடம். ஆனால் அஜீத்தின் வரலாறு நன்றாக ஓடுகிறதாம். குளோசப்பில் அஜித் முகம் பார்க்க பயமாய் இருக்கிறது. என்னமோ, வீட்டுல புருஷன் ஒரு வார்த்தை தப்பா பேசினா கூட உள்ள வெச்சிடுவாங்கன்னு சட்டம் எல்லாம் வந்திருக்கு, ஆனா வன்புணர்வுயில் ரெட்டை புள்ளை பெத்திக்கிறதா சீன் வருது. கேட்ட இருபத்தி அஞ்சு வருஷத்துக்கு முந்திய பிளாஷ்பேக்குன்னு சொல்லுவாங்க. அது சரி, கதை அப்ப நடக்கும்போது இந்த சட்டம் இல்லையே :-)

ஹமாம் நலுங்கு மாவு அல்லது நலங்கு மாவு என்று ஒரு சோப் வருதே, அதுக்கு மற்ற மொழிகளில், ஆங்கிலம் உட்பட என்ன பெயருங்க? இங்க கிடைக்காததால், விளம்பரம் வரும்பொழுது எல்லாம் இந்த சந்தேகம் வருகிறது ஆமாம், நலங்கு/ நலுங்கு மாவு
என்ற பெயர் தமிழில் கேட்டதே இல்லையே? அப்படி ஒரு மாவு இருக்கா என்ன?

ஜெயாவில் ஜெயம் குண்டு சாம்பார் பருப்பு வழங்கும் ஜெயம் சீரியல் என்ன பேய், பூதம் கதையா? அல்லது ஏதாவது பிரீயட் படமா மன்னிக்கவும் ப்ரீயட் சீரியலா? எல்லாரும் விசித்திர ஆடை அலங்காரங்களுடனும் பயமுறுத்தும் மேக்கப்புடனும் வருகிறார்களே?
லைட்டிங் வேறு விசித்திர கோணத்தில் சுதா சந்திரனையும், நளினியையும் காட்டி பயமுறுத்துகிறது. அப்படியே கல்கி, ரோஜா சீரியலையும் யாராவது பார்க்கிறீர்களா? எப்பொழுதும் டிரெயிலரில் பழி வாங்குதல், குழந்தை கடத்தல், இரண்டு கல்யாணம் என்று
ஓரே மாதிரி வருகிறது? அது சரி எல்லாம் சீரீயலிலும் இதே கதைதானே?

அடுத்து, இணையத்தில் அதிகம் இடம் பெற்ற இந்த வார சொல் பார்பனர்/ பிராமணன் மற்றும் பெரியார். என்ன ஒற்றுமை! முதல் வார்த்தை இருபதாயிரத்து நானூற்றி ஐம்பத்தி மூன்றரை தடவையும், அடுத்த வார்த்தை இருபதாயிரத்து நானூற்றி ஐம்பத்தி ஒன்றே கால்
தடவையும் வந்துள்ளது. (கால், அரை கணக்கு ஸ்பெல்லிங் மிஸ்டேக், அதாவது அவசரத்தில் உணர்ச்சி வேகத்தில் தட்டச்சும் பொழுது கால் போட தவறியது போன்று)

அடுத்து இளைய ராஜா வேகமாக முன்னேறியதுப் போல தோன்றினாலும், மேற் சொன்ன இரண்டு பெயர்களே இ.ரா பதிவின் பின்னுட்டத்திலும் அதிகம் காணப்பட்டதால் அவர் மூன்றாவது நிலைக்கு தள்ளப்பட்டுள்ளார். முதல் இரண்டு இடத்திற்க்கு போட்டி அதிகம், ஜெயிக்கப் போவது பெரியாரா, பார்பனரா என்பதை கணிக்க இயலவில்லை.

பத்திரிக்கை மேட்டருக்குப் போவோமா? சக்தி விகடனில் வரும் அபத்தங்கள் 22, செப்டம்பர் 2006, சக்தி விகடனில் வந்ததாய் பத்மா அரவிந்த் எழுதியது மீண்டும் உங்கள் பார்வைக்கு. இந்தளவு மூட நம்பிக்கை கருத்துக்கள் உங்கள் பத்திரிக்கைகளில் வருவது உங்கள் பார்வைக்கு வருகிறதா ஆனந்தவிகடன் எடிட்டர் சார்?

ஒருவர் இறந்த பின் அவரது கண், சிறுநீரகம், இதயம் போன்ற உறுப்புகளை பிறருக்கு தானம் செய்யலாமா? என் அம்மாவின் கண்களைப் பொருத்தி இப்போது இருவர் பார்வை பெற்றிருக்கிறார்கள். ஆனால், ஏதோ ஒரு குற்ற உணர்ச்சி என் மனதில் உள்ளது. என்ன செய்வது?

_ ஆர்.விஜயா, பாண்டிச்சேரி.

இந்தியாவுக்கு என்று ஒரு தனி மரபு உண்டு. இந்த மண்ணில் பிறந்தவன் அப்படியே மண்ணில் போய்ச் சேர்கிறான். அவன் வேறு எங்கேயும் போகக்கூடாது என்பது நம் கோட்பாடு. ஒரு மனிதன் இறந்த பின், பூத உடல் கிடக்கும்போதே, ‘இந்த உடலில் உள்ள பஞ்ச பூதங்கள், அந்தந்த பூதங்களோடு போய்ச் சேரட்டும்’ என்று பிள்ளை மந்திரம் சொல்கிறார். ‘உயிர் போன உடலை என்ன செய்வது?’ என்கிற கேள்விக்கு வேதம் முன்னமேயே பதில் சொல்லியிருக்கிறது. எந்தப் பஞ்ச பூதத்திலிருந்து மனிதன் தோன்றினானோ அதே பஞ்ச பூதங்களில் கரைந்துவிடவேண்டும்.

தற்காலிகமாக ஒருவருக்கு உதவி செய்ய முடிந்தது என்பதில் நீங்கள் சந்தோஷப்பட்டுக் கொள்ள முடியாது. கண்ணை வாங்கியவர், அவரது இயல்பான பார்வையைப் பெற முடியும் என்பது பொய். எந்தப் பொருளை தானம் செய்வது என்று நியதி உண்டு. யானை செத்தாலும் பயனுண்டு, மனிதன் செத்தால் யாருக்கும் பயனில்லை என்று பழமொழியே உண்டு.

முதல் நாள் தீவைத்து எரிக்கிறோம். மறு நாள் அந்தச் சாம்பலைக் கொண்டு போகிறோம். எரியாமல் ஏதாவது மிச்சம் இருந்தால், அதையும் எரிக்கிறோம். உங்கள் தாயாரின் கண்ணைக் கொடுத்துவிட்டீர்கள் என்றால், அங்கே அவர் முழுசாக இல்லை. வேறு எங்கேயோ கொஞ்சம் மிச்சம் இருக்கிறது. கர்மாவே பண்ண முடியாது. எல்லாம் எரிந்தால்தானே பாலே விட முடியும்? ஏதாவது குறைபாடு இருக்குமேயானால் பரிகாரம் செய்ய வேண்டும் என்று தர்ம சாஸ்திரம் வலியுறுத்தும்.

ஒருவரின் உடலுறுப்பை இன்னொ ருத்தருக்குப் பயன்படுத்துவது நம் சாஸ்திரத்துக்கு விரோதமானது. சாஸ்திர விரோதமாக எத்தனையோ காரியங்கள் செய்யப்படுகின்றன. இதையும் அப்படி எடுத்துக் கொள்ள வேண்டியதுதான்.

ஒருவருக்குக் கண்ணைக் கொடுத்து விட்டு ஒதுங்குவதற்குப் பதிலாக அவருக்குக் கண்ணாக இருந்து உதவி செய்யலாமே? கால் இல்லாதவர் என்றால், அவர் உட்கார்ந்து செய்வது மாதிரியான வேலை கொடுத்து அரவணைக்கலாமே..? இப்படியும் சிந்திக்கலாமே!

கேள்வி பதில் பல முன்னுக்கு பின் முரணான பதில்கள். . இந்த வாரம் ஒரு கேள்விக்கு
பதில் படியுங்கள்.

வேத காலத்தில் மைத்ரேயி & சாவித்ரி போன்ற ஸ்திரீகள் மந்திர த்ரஷ்டாக்களாக இருந்ததை அறிய முடிகிறது. இந்தக் காலத்தில் பெண்கள் மந்திரங்களைச் சொல்ல முடியுமா? அதற்கு சாஸ்திரங்கள் அனுமதிக்கிறதா?

& தேதியூர் பாலு, சென்னை&11

வேத காலப் பெண்கள் மாதிரியே நம் பெண்களும் தகுதி வரவழைத்துக் கொள்ள முடியுமானால், இந்தக் காலத்திலும் மந்திர த்ரஷ்டாக்களாக வரலாம். நாம்தான் நமது கலாசாரத்தில் இருந்து வெகுதூரம் விலகி வந்து, மாற்றுக் கலாசாரத்தை வாழ்க்கை முறையாக ஏற்றுக் கொண்டு விட்டோமே... நம்மால் எப்படி அவர்களை பழைய மாதிரியாக மாற்ற முடியும்?

கடைசி வரிகள், என்னமோ பெண்கள் மட்டும் கலாச்சாரத்தை விட்டு விட்டு மேன் நாட்டு மோகத்தில் அலைவதாக சொல்லியிருக்கிறார். ஆ.வி குழுமத்து எடிட்டர் ஐயா! உங்கள் பார்வைக்கு இவை எல்லாம் வருவதில்லையா? ஏன் இத்தகைய மூட நம்பிக்கைகளைப் பரப்புகிறீர்கள்? பொது ஜன ஊடகம் தரும் பாதிப்பு மிக அதிகம். ஆனந்தவிகடன் போன்று மக்களின் நம்பிக்கைப் பெற்ற,அதிக வாசகர்கள் கொண்ட பத்திரிக்கைகள் இத்தகைய பொறுப்பற்ற செயல்கள் செய்வது சரியா?

குமுதத்திலும் இத்தகைய அபத்தக்கங்கள் உண்டு . கையில் கிடைத்த கல்கி 29-10- 2006 இதழ். சுவாமி சுத்தானந்தாவின் (யார் இவர்) "ஏன் கடவுள் ஏன் தோழன்" தொடர் ஆரம்பிக்கப் போகிறதாம். எங்கிருந்துதான் இந்த ஆனந்தாக்களைப் பிடிக்கிறார்களோ? ஒவ்வொரு
பத்திரிக்கைக்களும் கொடுக்கும் விளம்பரத்தால் இத்தகைய ஆன்மீகவாதிகள் வாழ்க்கை ஒளிர தொடங்குகிறது. என் இளமைப் பருவத்தில் டாக்டர் உதயமூர்த்தி ஆனந்தவிகடனில் எழுதிய தொடர்கள், பிறகு இறையன்பு, தென்கச்சி சாமிநாதன் போன்றவர்களின் கட்டுரைகள் கொடுத்த தாக்கம் மிக அதிகம்.

இவ்வார சூப்பர் பஞ்ச். உபயம் சுஜாதாவின் க.பெ


வாயைத் திறக்காமல் ஒன்றுமே தெரியாத முட்டாள் போலத் தோன்றுவது, வாயைத் திறந்து அதை ஊர்ஜிதம் செய்வதைவிட மேல்!

& மார்க் ட்வெய்ன்