எனக்கு பொழுதுபோகவில்லை

பொழுது போகவில்லை எனக்கு
கையில் கிடைத்த அட்டையில்
ஜிகினாதாளை ஒட்டி தயாரிக்கிறேன்
ஒரு அட்டை கத்தி
விளக்கொளியில் பளபளக்கிறது கத்தி!
காற்றில் விசுகிறேன்
மனம் போனப்படி!
லேசாய் படுகிறது
எதிராளியின் கண்ணில்
தொடங்கியது யுத்தம்
வேண்டாம் இந்த சலசலப்பு
சும்மா இரு என்று பலர் கூறினாலும்
பொழுது போகவில்லையே எனக்கு!
லேசான காயம், சொரிந்து
சொரிந்து பெரியதாகிறது
ரத்தமும், சீழும் வழிகிறது பார்
என்றுக் கூக்குரலிட்டேன்
மருந்தும் அறிவுரையும்
நாலாப்பக்கத்தில் இருந்துவர
மனதிற்குள் புன்னகைக்கிறேன்
புண்ணின் வலி அதிகரித்தாலும்
சொரிவதில் உள்ள சுகம்
அவர்களுக்கு தெரியவில்லை
என்ன செய்வது
எனக்கு பொழுதுபோகவில்லையே!