2006

போன வருடம் எழுதிய திரும்பிப்பார்க்கிறேன்- 2005ல் முதல் பத்தியில் சில, பல வரிகள்.

தமிழ் இணையம்- இணையத்தில் தமிழின் வளர்ச்சியைப் பார்க்க, பார்க்க பிரமிப்பாய் இருக்கிறது. நிறைய புதுமுகங்கள், தமிழில் முதல் முறையாய் தட்டச்சு செய்ய ஆரம்பித்தவர்கள் கூட, மிக அருமையான படைப்புகளைப் படைக்க ஆரம்பித்துள்ளார்கள். இணையம் ஒருவகையில் குருபீடங்களை தகர்த்து விட்டது என்று சொல்லலாம். நன்றாக எழுதப்படும் எழுத்து நிற்கும். யார் எவர் என்று எல்லாம் ஆள் பார்த்து, வாழ்த்தாமல் எழுத்தைப் பார்த்து பாராட்டுவது ஆரோக்கியமான வளர்ச்சிக்கு அறிகுறி. ஆரம்பத்தில் பிரபலமானவர்கள் எழுத ஆரம்பித்து, பின்பு விலகி புதியவர்கள் தமிழில் எழுதி பழக்கமில்லாதவர்கள் புதிது புதிதாய் தினமும் வலையுலகில் நுழைவதைப் பார்க்கும்பொழுது, தமிழ் வாழும் என்ற நம்பிக்கை வருகிறது. சங்க தமிழ் போல, இணையத் தமிழ் என்று ஒன்று மெல்ல, மெல்ல உருவாகி வருகிறது.

இனி இவ்வருடம் - 2006

எனக்குப் பிடித்த சில பதிவர்களையும், பதிவுகளையும் நினைவுப்படுத்திக் கொள்கிறேன். இது முழுக்க முழுக்க என் ரசனையே தவிர, இவர்கள் யார் என்ன என்ற விவரமோ, தனிப்பட்ட நட்போ கிடையாது என்ற நினைவுடன் படிக்குமாறு வேண்டிக்கேட்டுக் கொள்கிறேன். இவர்கள் அனைவரும், இந்த வருடம் அதாவது 2006ல் பிளாக் எழுத ஆரம்பித்தவர்கள்.

இதில் முதலில் கவிதா, http://kavithavinpaarvaiyil.blogspot.com

அம்மணி சும்மா இல்லாமல் ஒரு குரங்குக்குட்டியை மன்னிக்கவும், அணில்குட்டியை மடியில் கட்டிக் கொண்டு எழுதுராங்க. இந்த உத்தி மிக அருமை. கிட்டதட்ட மனசாட்சி மாதிரி. இவங்க சீரியசா ஏதாவது சொன்னா, இந்த அணிலு அனிதா எடக்குமடக்கா கமெண்ட் அடிக்குது. வர வர கவிதாவின் பதிவைப் படிக்க ஆரம்பிக்குபோதே, கடைசியில் அனிதா எப்படி வாரப்போகுது என்ற ஆவல் அதிகமாயிட்டே போகுது. கவி, வாழ்த்துக்கள், விடாதீங்க இந்த உத்தியை. தொடர்ந்து எழுதுங்க.

அடுத்து மதுரா. http://tamizhachchikal.blogspot.com

திருநெல்வேலி பொண்ணு போல, போடு போடுன்னு போடுராங்க. சின்ன சம்சயம், அவுங்களா இவுங்கன்னு :-) அடிச்சி தூள் கெளப்புராங்க. அதில அடிக்கடி தனக்கு ஓண்ணுமே தெரியாதுன்னு தன்னிலை விளக்கம் வேற. அவர் எழுதும் முறை, பாவிக்கும் வார்த்தை நடை மிக அதீதம் என்று சிலர் சொல்லியிருக்கிறார்கள். அப்படி எல்லாம் ஒண்ணுமே இல்லை, அடிச்சி ஆடுங்க. சில விஷயத்துக்கு இத்தகைய அணுகுமுறை சரியே :-) ஊரூ, உலகிலே கடவுள் எங்கேன்னு தேடி அலையும்போது, அம்மணிக்கு மெதுவடையிலும், தொட்டுக்கக் கொடுத்த கெட்டி சட்னில கடவுள் தெரிகிறார் இவருக்கு.

அடுத்த நம்ப பிரண்டு கோம்பை அம்மணி. http://premalathakombaitamil.wordpress.com/

எனக்கு பிரேமலதா என்று ஒரு பெஸ்ட் பிரண்டு இருந்தா. ஒரு மாதிரி குரு என்றும் சொல்லலாம். அவதானோ என்று தனிமெயில் போட்டு இல்லை என்று தெரிந்துக் கொண்டேன். பெயர் மட்டுமே மிக நட்பாய் உணர்ந்தால் படிக்க ஆரம்பித்து அம்மணியின் குறும்பு/ குசும்பு பிடிச்சிப் போச்! உதாரணமாய்- பார்ட்டில் நடப்பதாய் ஒரு குசும்பு (என் நினைவிருக்கும்வரையில்)

என்ன சூப்பர் பிரியாணி! நீயும் சமைக்கிறியே சவ சவன்னுட்டு
தோடா நாங்க என்ன சும்மாவா இருக்கோம், வேலைக்கும் போறோமில்லே?
ரொம்ப அலட்டாதே, ரமேஷ் கூட வேலைக்குப் போறார். உன்னைவிட ஹை போஸ்ட்

- போதுமா :-) அம்மணியின் குசும்பு. இந்த மூவரின் பிளாக்கை இட்லிவடையில் பெண்கள் வலைப்பதிவில் புலம்புகிறார்கள் என்ற கருத்து கணிப்புக்கும், என்னமோ பெண்கள் வாழ்க்கையை ரசிக்காமல் எந்திர தனமாய் இருக்கிறார்கள் என்று எழுதிய வெளிகண்ட நாதர்,
டெடிகேட் செய்கிறேன். அதே சமயம், எழுத்தில் குறும்பு மட்டுமல்ல, சமூகத்தைப் பார்க்கும் ஆழ்ந்த பார்வையும் உண்டுங்கோ!

சரி, இனி ஆண்குல திலகங்கள்.

இயற்கை நேசி- http://kurangumudi.blogspot.com/

தெக்கத்தியான் என்ற பெயரில் எழுதிக் கொண்டு இருந்தாலும், இயற்கையின் அற்புதகங்களுக்கு என்று இந்த பதிவு. இதில் என்ன போட்டாலும் பார்த்தவுடன் படித்துவிடுவேன்- காதில் புகை
விட்டுக் கொண்டு !

அடுத்து மா.சிவகுமார். http://ezhuththu.blogspot.com/

மனுஷன் வேறு சில பதிவுகள் வைத்திருந்தாலும் எண்ணங்களை எழுதுகிறேன் பிடித்துப் போய்விட்டது. சில சமயம், இழுவையாய் தோன்றினாலும், பல முறை எதையாவது யோசிக்க வைத்துவிடுகிறார்.

யோகன் - http://johan-paris.blogspot.com

இவர் பின்னுட்டங்கள் மூலம் அறிமுகம் ஆனவர். அவ்வருடம் அவர் எழுதிய பனைமரம் பற்றிய பதிவு- கற்பகதரூ மிக அருமையாய் வந்திருந்தது. பல புதிய விஷயங்கள், ஈழத்தைப் பற்றி பல செய்திகள் என்று எழுத ஆரம்பித்துள்ளார்.

வலைப்பதிவின் எதிர்காலம் பற்றி பலரும் அலச ஆரம்பித்துள்ளார்கள். இவ்வருடத்திய சாதனையாளர், தனிப்பட்ட முறையில்

செந்தழல் ரவியின் வேலை வாய்ப்புக்கான பிளாக்-http://tedujobs.blogspot.com/
வாழ்த்துக்கள் ரவி

அடுத்து குழு பதிவர் முறையில்- விக்கிபசங்க- http://wikipasanga.blogspot.com/
நல்ல உருப்படியான விஷயம். நல்லா செய்யுங்க பசங்களா!

வலைப்பதிவுகள் வளர்ச்சிக்கு முக்கிய காரணம் சுதந்திரம், இந்த சுதந்திரமே சில சமயம் வழி மாறிப் போகவும் செய்தது. ஆனால் உண்மையில் எழுத வேண்டும் என்ற ஆர்வத்துடன், சிந்தனையுடனும் முயற்சி செய்பவர்களுக்கு வலைப்பதிவுகள் ஒரு வரப்பிரசாதம்

இந்த வரிகளும் சென்ற வருடம் எழுதியவை. வேறு சிலரின் சில மனத்திற்குப் பிடித்த பதிவுகளை எடுத்து எழுத வேண்டும் என்று இருந்தேன். நேரமில்லை. இனி இவ்வருடம் புதியதாய் பதிவு எழுத வருபவர்களுக்கு என் வாழ்த்துக்கள்.