அமீரகம்- ஓராயிரம் கதைகளில் மூன்று

நான் இருக்கும் ஊரின் விமானநிலயம் மிக சிறியது. ஒருமுறை சென்னைக்குப் பயணிக்க காத்திருந்தபொழுது, அதே நேரம் கொழும்பு செல்லும் விமானம் வந்தது. 99.9 % சதவீதம் பணிப்பெண்கள். இந்த ஊரிலேயே இவ்வளவு மெயிடுகளா என்ற வியப்பு, அருகில் அமர்ந்திருந்தவரிடம் வார்த்தைகளாய் கொட்டும்பொழுது, "எல்லாம் சிறு வயசு. அபார்ஷன் செய்ய ஊருக்கு போறாங்க. இங்க சட்டப்படி தவறில்லையா?" என்ற வரிகள், நடப்பவைகளை அதிகப்படி பேசுவது நம்மவர்களுக்கு சாதாரணம் என்றாலும் செய்தி சொன்ன அதிர்ச்சியை பத்திரிக்கைகளில் அவ்வப்பொழுது வந்துக் கொண்டிருக்கும், மெயிட்டுகள் மீதான வன்கொடுமைகளைப் பற்றிய செய்திகள் ஊர்ஜிதமாக்குகின்றன. அதுமட்டுமல்லாமல் தனிமையின் கொடுமையை சமாளிக்க துணையைத் தேடுவதும், சிரித்துப்பேசும் தன் ஊர் காரர்
என்று நம்பி வலையில் வீழ்வதும், செய்வது என்னவென்று நன்கு தெரிந்தே செய்வதும் காரணங்களை அடுக்கிக் கொண்டே போகலாம் இல்லையா?

இங்கு கதை என்று சொல்லக்காரணம், அனைத்துமே பிறர் சொல்ல கேட்டது, அதில் சில மசாலாக்கள் சேர்த்திருக்கலாம்.

உமா திருச்சூரை சேர்ந்தவர். அவருடன் ஷாப்பிங் காப்பிளக்சை வலம் வரும் வந்துக் கொண்டிருந்தப்போது, எங்களை தாண்டி சென்றது கருப்பு புர்க்கா அணிந்த பெண்கள் கூட்டம். தோரணையைப் பார்க்கும்போதே, பெரிய ஷேக் குடும்பம் என்றும் தெரிந்தது. அதில் இருந்து
ஒரு பெண் வேகமாய் வந்து, உமாவுடன் சில வார்த்தைகள் மலையாளத்தில் கதைத்துவிட்டுப் போனார்.

"கோடிஸ்வர ஷேக்கு மனைவிக்கு ஆயாமாதிரி இந்தம்மா. அந்த பொம்பளைங்க மாதாமாதம் நகை வாங்குபோது, இவரையும் ஏதாவது வாங்கிக் கொள்ளும்படி சொல்வாங்களாம். இங்க வந்து பதினஞ்சு, இருபது வருஷம் ஆச்சு. ஐநூறு பவுனு நகை, ஊர்ல வீடு, நிலம்னு நல்லா சேர்த்துட்டாங்க. ஆனா பாவம், இதெல்லாம் ஊர்ல சொன்னா யாரும் நம்ப மாட்டேங்கீராங்க. பாவம் இந்தம்மா, தப்பான முறையி சம்பாதித்த காசு என்று சொந்தக்காரங்களே பேசுராங்கன்னு வருத்தம் அவுங்களுக்கு"- கிடைத்தாள் என் நாயகி.

என் வீட்டில் சில வருடங்கள் வேலை செய்த, சொந்த மக்களாலும், கணவனாலும் வஞ்சிக்கப்பட்ட சோமா என்ற ஐம்பது வயதைக் கடந்த பெண்ணின் துயரக்கதை, திருமணமே வேண்டாம் என்று அதே சமயம் ஒழுக்கம் தவறாமல், ஊரில் நிலம், வீடு வாங்கி, சொந்த சகோதரிகள் உதவியுடன் வாழ்க்கையை சரியாய் திட்டமிட்ட காந்தி என்ற பெண், சிங்கள பெண்களை வேலைக்கு அமர்த்தும் ஏஜன்சி நடத்தும் பெண் போன்றோர் மற்றும் அவ்வப்பொழுது பத்திரிக்கையில் வரும் செய்திகள்.

வேலை வாங்கித் தருவதாய் அமீரகத்திற்கு அழைத்து வந்து தவறான பாதையில்
வலுக்கட்டாயமாய் நுழைத்தவளிடமிருந்து வந்து சேர்ந்த நாளே, ஷார்ஜாவில் தப்பித்த பெண், தன்னிடம் வந்த நல்ல மனம் படைத்தவர் உதவியுடன் இந்திய தூதரகத்தில் அடைக்கலம் ஆனவள், கிழவனை மணந்து, பிள்ளைகளையும் பெற்று, கடைசியில் கணவனை கொன்றுவிட்டாள் என்ற பழியை ஏற்று, பல நல்ல உள்ளங்களின் உதவியுடன் ஜெயில் வாசத்தில் இருந்து தப்பித்து தன் நாடு போய் சேர்ந்தவளின் பரிதாபக்கதை போன்று பல உண்மையான சம்பவங்கள், செய்திகள். அனைத்தில் இருந்து மூன்று பெண்களின் உண்மை சம்பவங்களை எடுத்து, கதைக்கு என்று சிலவற்றை சேர்த்தும் நல்ல முடிவு என்று கொஞ்சம் நாடக தன்மையுடன்
(வேறு வழியில்லாமல்) நாவல் ஆக்கியதுதான் "கரையைத் தேடும் ஓடங்கள்".

கலைமகள் தரப்போகும் பரிசு தொகையான ரூபாய் இருபத்தி ஐந்தாயிரம் முழுவதையும் என் சொந்த உபயோகத்திற்குப் பயன்படுத்தப்போவதில்லை என்பதே நான் இவர்களுக்கு தரும் பதில் மரியாதையாய்நினைக்கிறேன்.