வயது வந்தவர்களுக்கு மட்டும்- ஒன்று

பொங்கி எழுந்து விட்டேன் எத்தனை நாட்களுக்கு பொறுத்துப் போவது? பேசுகிறார்கள், நா கூசாமல் பொய்யும் புனை சுருட்டுமாய். அறியா பிள்ளைகளை பாழ்கிணற்றில் தள்ளிப் பார்த்து வேடிக்கைப் பார்க்கிறார்கள். திராபை படம் என்று தெரிந்தும் பார்த்துவிட்டு, போகிறவர்களை எல்லாம் போகாதே போகாதே என்று ஒப்பாரி வைப்பதுப் போல, வாழ தெரியாமல், மனைவிகளை கொடுமைப்படுத்திக் கொண்டு, ஆசையாய் மணக்கும் பையன்களின் மனதில் நஞ்சை கலக்கிறார்கள் நயவஞ்சக கயவர்கள்.

இதோ "ஆணுக்கும் பெண்ணுக்கும் என்னாளும் உள்ள கதை" என்ற தலைப்பில் முன்பு போட்டது
மீள்பதிவு.

எம். ஜி. எம் நிறுவனத்தார் தயாரிப்பில் உருவான "டாம் அண்டு ஜெரி" கார்ட்டூன் படத்தைப் பார்த்திருப்பீர்கள். அதில் ஓயாமல் எலியை பூனை துரத்தி துரத்தி பாடாய் படுத்தும். அதே சமயம், பூனை பேசாமல் இருக்கும்பொழுதும், இந்த எலி வாலை சுருட்டிக் கொண்டு இராமல், பூனையை வம்புக்கு இழுக்கும். நன்கு கூர்ந்துப் பார்த்தால், அந்த பூனையாலும், எலியாலும் ஒன்றை ஒன்று பிரிந்து இருக்கவே முடியாது என்பது விளங்கும்.

அதுப் போலதாங்க, நம்ம ஊரூ, புருஷன் பொண்டாட்டியின் தாம்பத்திய வாழ்க்கையும். என்னத்தான் நித்தமும் அடிச்சிக்கிட்டாலும், டிவோர்ஸ்க்கு எல்லாம் போக மாட்டாங்க. நமக்கு வாச்சது அவ்வளவுதான் என்று தத்துவம் பேசிக்கிட்டு இருப்பாங்க. இது ஆணுக்கும்
பொருந்தும் பெண்ணுக்கும் பொருந்தும்.

நான் இப்ப இங்க பதியப் போகிற சமாச்சாரம் எல்லாம், சொந்த மேட்டரூ அல்லாம, அங்க இங்க கேட்டது, பார்த்தது சேர்த்துதாங்க. ஆனா ஒண்ணுங்க, இது பெண்ணீய போர்வையில் ஆண்களை தவறாக சித்தரிக்கப் போவதில்லை. பொதுவாய் கணவன், மனைவி இருவர்களின் பிரச்சனை, மனநிலை என்று எழுதப் போகிறேன். சில சமயம் சேம் சைடு கோல், அப்பட்டமா இருந்தா யாரும் கோச்சிக்காதீங்க.

ஒரு காமடியான விஷயம். சினிமா ஸ்டாரூங்க, கல்யாணம் ஆன மூணாவது நாளு, அசத்தலான போட்டோக்களுடன் பத்திரிக்கைகளில் போஸ¥ம், பேட்டியும் கொடுப்பாங்க. ஈரோ, மனைவி என்றால் இப்படிதான் இருக்க வேண்டும் என்று, புது மனைவியைச் சொல்வதும், அத்தனை பெரிய ஈரோ காலையில் காப்பி போட்டு தன்னை எழுப்பவார் என்று காதல் பொங்க மனைவி சொல்லும்பொழுது, கோடிகள் வாங்கிக் குவிக்கும் ஈரோ, வீட்டில் நாலைந்து வேலைக்காரர்கள், சமையலுக்கு ஆள் இருக்க, அவரே காப்பி போட்டு எழுப்புவார் என்றால் படிப்பவள் கண்ணில் நீர் வருமா இல்லையா?

அதை விட, தன் மனைவி , சீதா தேவி, பத்தினி தெய்வம் கண்ணகிக்கு இணையானவள் என்று தியாக பட்டியலை, ஈரோ சொல்ல சொல்ல, நம் ஆளுக்கு வயிறு எரியும். சே என்று பத்திரிக்கையை தூக்கி எறிந்து தன் இயலாமையை தணித்துக் கொள்வார். ஆனால் இந்த "மேட் பார் ஈச் அதர்" ஜோடி, கல்யாணம் ஆன சில வருடங்களில் புட்டுக் கொண்டு, அதே பத்திரிக்கையில் இருவரும் ஒருவரை ஒருவர் நாற அடித்துக் கொள்வார்கள்.

அடுத்து, பிரபலங்கள் பேட்டி, அதிலும் இத்தகைய கணவன்/ மனைவி கிடைக்க தான் போன ஜென்மத்தில் என்ன பாக்கியம் செய்தோமா என்று எல்லா பிரபலங்களும் சொல்லி வைத்தார் போல ஓரே மாதிரி சொல்வார்கள். ஆனால் இவை எல்லாம் எந்தளவுக்கு உண்மை
என்றால், அந்த கடவுளுக்குதான் வெளிச்சம்.

ஒரு விஷயம் யோசிச்சிப் பாருங்க, ஒரு குடும்பத்தில் கணவன் சொன்னதை எல்லாம் மறு பேச்சு கேட்காமல், மனைவி செய்வதும், மனைவி சொல்லே மந்திரம் என்று வீடு இருந்தால் அது நல்லாவா இருக்கும். மேலே சொன்ன வரிகளை நல்லா ஒரு முறைப் படிச்சிக்குங்க.
நான் சொல்ல வருவது இருவரும் ஒருவர் பேச்சை அப்படியே கேட்டு நடப்பது, ஒருவர் மட்டும் அல்ல :-)

அப்ப, அப்ப சின்ன சின்ன சண்டைகள்/ இலக்கிய தரமாய் சொல்ல வேண்டும் என்றால் ஊடல் கட்டாயம் இருக்க வேண்டும். அப்பொழுதுதான் வாழ்க்கை சுவைக்கும். சண்டையே போடாத தம்பதியர் என்று யாராவது இருக்கிறார்கள் என்றால் அவர்களிடம் ஏதோ பிரச்சனை. பெயருக்கு கணவன் மனைவியாய் ஊருக்காக வாழ்ந்துக் கொண்டு அவரவர் வழியில் போய் கொண்டு இருக்கிறார்கள் என்று அர்த்தம்.

எதற்கும் ஒரு முறை "தேவை ஒரு அவன் விகடன்" என்று எழுதி இருந்தேன். இதைப் படித்துவிடுங்கள்.


சரி, முதலில் பிரச்சனை எப்படி ஆரம்பிக்கிறது என்றுப் பார்ப்போமா?