அரசு பள்ளிகளிலும் கதைச் சொல்லுதலும், book readingம் தேவை

இந்து செய்தித்தாளின் மெட்ரோ பிளஸ்ஸில் அவ்வப்பொழுது கண்ணில் படுவது, குழந்தைகளுக்கு கதைச் சொல்லுவது, கூட்டமாய் புத்தகங்கள் வாசிப்பது பிறகு அதைக் குறித்து கலந்துரையாடல் போன்றவைகளைப் பற்றிய செய்திகள்.

நானும் அம்மாவும் சில மாதங்களுக்கு முன்பு எங்கள் காலனி குழந்தைகளுக்கு கதை நேரம் ஆரம்பித்தோம். கடவுள், கடவுளர்கள் கதைகளை தவிர்த்து சிறு வயதில் கேட்ட கதைகள், தெனாலிராமன் வகையறா கதைகள் என்று லிஸ்ட் போட்டதிலேயே நூற்றுக்கணக்கில் கதைகள் கிடைத்தன. என் காடாறு மாதம், நாடாறு மாத வாழ்க்கையில் அது நின்றுப் போனது. ஆறு வயதில் இருந்து பன்னிரெண்டு வயதுவரையான குழந்தைகள் மிக ஆவலுடன் வந்தார்கள்.

இதில் இன்னும் ஒரு சுவாரசியம் என்னவென்றால், அம்மாக்களும் கதைக் கேட்க உட்கார்ந்ததுதான். அக்கதைகளை அந்த அம்மாக்கள் கேட்டதும், படித்ததும் இல்லை என்றார்கள். வேறு என்ன, வாசிக்கும் பழக்கம் பெற்றவர்களுக்கு இல்லை. ஆனால் இன்றைய டிரெண்டு படி குழந்தைகள் வாசிக்க வேண்டும் என்று விரும்புகிறார்கள் புத்தகம் வாங்க செலவழிக்கவும் தயங்குவது இல்லை.

ஆனால் குழந்தைகள் வாசிக்க விரும்புவதில்லை என்ற புகாருக்கு என்னுடைய காலணா அறிவுரை, நீங்கள் முதலில் படிக்க தொடங்குங்கள் என்பதுதான்.

வாசித்தல் என்பது ஒரு பழக்கம். சிறு குழந்தைகளுக்கு, பள்ளிகளிலேயே கதை சொல்லுதல், புத்தக வாசிப்பு போன்றவைகளை ஆரம்பித்தால், தொலைக்காட்சி மோகம் குறையலாம்.

நான் முதல் பாராவில் குறிப்பிட்ட பள்ளிகள் எல்லாம் பிரபல சிபிஎஸ்ஸி பள்ளிகள்
அரசு பள்ளிகளிலும், மெட்ரிக்குலெஷன் பள்ளிகளிலும் படிக்கும் குழந்தைகளுக்கும்
கதை நேரம் ஆரம்பிக்க வேண்டும்.

இன்றைய காலக்கட்டத்தில் வீட்டு வேலை செய்யும் பெண்கள் உட்பட பெற்றோர்களுக்கு தங்கள் பிள்ளைகளை நல்ல முறையில் படிக்க வைத்து வேலைக்கு அனுப்ப வேண்டும் என்ற ஆவல்
உள்ளது. அதற்கு கடினமாய் உழைக்கவும் செய்கிறார்கள். ஆனால் நல்ல விஷயங்களை
அவர்களுக்கு சொல்லிகொடுக்க வழிக்காட்டிகள் இல்லை. சுலப பொழுதுப்போக்கு என வீட்டில் இருக்கும் நேரங்களில் டிவி சீரியல்களில் மூழ்கிப் போகிறார்கள்

புத்தகங்கள் இதற்கு நல்ல தீர்வு. சாதாரண மக்கள் படிக்கும் பள்ளிகளில் குழந்தைகளுக்கு வாசிக்கும்பழக்கத்தை உண்டாக்க சென்னையில் ஒரு தன்னார்வ குழு உருவாக்கினால் என்ன? யாராவது ஆரம்பித்தால், நானும் பங்குப் பெற ஆவலாய் உள்ளேன்.