என்னுடைய முதல் நாவல்- கரை தேடும் ஓடங்கள் வெளியாகிவிட்டது

என்னுடைய முதல் நாவல் கரை தேடும் ஓடங்கள் வெளி வந்துவிட்டது. நாவலைக் குறித்து பார்க்க இங்கே

. நம் கவிதாயினி மதுமிதா சந்தியா பதிப்பகம் திரு. நடராஜன் அவர்களை தொலைப்பேசியில் அறிமுகப்படுத்தினார், கதையை அனுப்பி வைத்தேன். என் வேலை அவ்வளவுதான். கடந்த ஆறுமாதமாய் வீட்டு வேலை, இட பெயர்ச்சி என்று ஆயிரத்தெட்டு பிரச்சனைகள், அதனால் புத்தக முயற்சியில் என் பங்கு எதுவும் இல்லை. ஆனால் அட்டை படம் உட்பட எல்லாம் நிறைவாய் உள்ளது.

அதிகம் அறிமுக இல்லாத, நேரில் பார்க்காத திரு நாகூர் ரூமி அவர்களிடம்
நாவலுக்கு முன்னுரை கேட்டு வாங்கினேன். அவருக்கு என் மனமார்ந்த நன்றிகள். என் கவனக்குறைவால் என்னுரையில் அவர் பெயரைக் குறிப்பிடாமல் விட்டு விட்டேன்.

ஏதோ,எனக்கு அறிமுகமுள்ள எழுத்தாளினி ஏகாம்பரியிடம் புத்தகத்தை தந்து
என்ன சொல்ல போகிறார் என ஆவலுடன் எதிர்ப்பார்த்தால் புத்தகத்தை
புரட்டியவர், திகைப்பூண்டை மிதித்தார்போல என்னது இது என்று அலறினாள்.

என்னடா இன்னும் என்ன குழப்படிகள் செய்து இருக்கிறோம் என்ற யோசனையுடன்
அவளை நோக்கினால், “கடைசி பக்கத்தில் புகைப்படம் போட சில விதி முறைகள்
உண்டு. இப்படியா பல்லைக்காட்டிக் கொண்டு போஸ் கொடுப்பது என்றாள்.

அவ்வளவு தானே என்று நிம்மிதி பெருமூச்சு விட்டதும், “படைப்பாளி என்றால்
சிந்தனையுடன் போஸ் கொடுக்க வேண்டும். லேசாய் ஆகாயத்தைப் பார்த்துக்
கொண்டு. இல்லாவிட்டால் பேனை பிடித்துக் கொண்டோ அல்லது இன்றைய
டிரெண்ட் படி கணிணி முன் அமர்ந்தும் போஸ் கொடுக்கலாம். பின்னணியில் உலக இலக்கிய புத்தங்களை அடுக்கி வைத்து அட்டகாசமாய் போஸ் கொடுப்பது போன்றவைதான் வழக்கம் மரபு” கோபமாய் ஆரம்பித்து சோகமாய் முடித்தாள்.

ஹி ஹி மரபை உடைக்கும் புரட்சி என்று வைத்துக் கொள்ளேன் என்றேன் வேறு என்ன சொல்ல 