மாயவரம் புகுந்து வந்த காதை

அதாகப்பட்டது, மயிலாடுதுறை என்று நாமக்கரணம் மாற்றப்பட்ட மாயூரம் என்ற மாயவரத்துக்கு இரண்டு நாள் போய் வந்தோம். சரியான வெய்யில், மின் துண்டிப்பு. என்றும் மாறாத அதே மாயவரம்.

மறுநாள் சித்திரா பெளர்ணமியன்று வைதீஸ்வரன் கோவிலில் விசேஷம் என்று சாரி சாரியாய் ஆயிரக்கணக்கான ஜனங்கள், கையில் கொம்புடன், கோவிலை நோக்கி நடந்துப் போய் கொண்டு இருந்தனர்.

கோடை வெய்யில், காலில் செருப்பு இல்லை. ஐந்து நாட்கள், ஒரு வாரம் என்று பக்கத்து ஊர்/கிராமங்களில் இருந்து, நடந்து வந்துக் கொண்டு இருந்தார்கள். இதே போல சமயபுரம் மாரியம்மன் கோவிலுக்கு நேர்ந்துக் கொண்டு நடந்து சென்றுக் கொண்டிருந்த மக்கள் கூட்டம் பார்த்த நினைவு.

மாயவரத்துல இப்படி எல்லாம் பார்த்ததே இல்லை என்று என் கணவர் அதிசயக்க, இப்ப எல்லாம் மக்களுக்கு பக்தி அதிமாயிடுத்து என்று பக்கத்தில் நின்றிருந்த பெரியவர் பரவசமாய் சொல்ல நானும் ஆமாம் என்றேன்.

பழைய பாலத்தை இடித்துவிட்டு புதுபாலம் வேலை நடந்துக் கொண்டு இருக்கிறது. சுந்தரம் தியேட்டர் இழுத்து மூடிவிட்டு, அங்கு ஷாப்பிங் காப்பிளஸ் வர போகுதாம். இது இரண்டு
தான் மாயவரத்தில் புதுமை ஆங்..புதுசாய் சென்னைக்கு ரயில் மாயவரம் வழியாய் போகுது.

வள்ளலார் கோவில் என்ற தட்சிணா மூர்த்தி கோவிலிலும், குருமூர்த்தி ஸ்கூல் சுவரிலும் உபயம் எஸ். எஸ்.வாசன் (யூ.எஸ்.ஏ) என்ற பெயர் கண்ணில் பட்டது. எனக்கு இந்த பெயரில் ரெண்டு பேரை தெரியும். அதனால் எல்லாம் நமக்கு தெரிஞ்சவங்கத்தான் என்று
குத்துமதிப்பாய் சொல்லி வைத்தேன்.

இருந்த இரண்டு நாளில் ஐயா, பையா படத்துக்கு போகலாம் என்று நச்சரிக்க,ரெட்டைச்சுழி புது படம், சங்கர் தயாரிப்பு எழுத்தாளர் டைரக்ஷன், இமயமும், சிகரமும் நடிக்குது என்றெல்லாம் பில்டெப் கொடுத்து, இழுத்துக் கொண்டு போனால்.. விதி என்னைப் பார்த்து கெக்கே பிக்கே என்று சிரித்தது என் கண்ணிலும் காதிலும் விழவேயில்லை.

படம் ஆரம்பித்த பத்து நிமிடத்துக்கு பிறகே விதியின் சிரிப்பு காதில் விழுந்தது. பக்கத்தில் குறட்டை சத்தம்.

இதுக்கு பையாவே போயிருக்கலாம் என்று நொந்துக் கொண்டேன். அஞ்சலி பார்ட் – 2 போல, சின்ன புள்ளைகள் பெரிய மனுஷத்தனமாய் பேச, பெரீயவங்க சின்ன புள்ளதனமாய் செஞ்சிக்கிட்டு இருக்க, ஏன் சுறா எல்லாம் ஓடுது என்று தெள்ள தெளிவாய் புரிந்துப்போனது.

“தூக்கம் கண்ணை சுத்திக்கிட்டு வந்ததா, படம் எப்படி? என்று கண்ணை கசக்கிக் கொண்டு எழுந்தவரிடம், “ஓ. கே ன்னு சொல்லலாம் என்று கித்தாய்ப்பாய் சொல்லி வைத்தேன். இந்த அறுவையை ஆவியும், கல்கியும் ஆஹா, ஓஹோங்குதுங்க. என்னத்த சொல்ல?

ஓட்டல் சிலம்பொலியில் தங்கினோம். அறையும், சாப்பாடு படு சுமார். மயூரா லாட்ஜ்ஜிலும், காளியாங்குடியிலும் டிபனும், காப்பியும் ஏ கிளாஸ்.