தமிழகத்தின் அடுத்த தலைவி குஷ்பூ.

போகிற போக்கைப் பார்த்தால், குஷ்பூவை பிரபலமாக்காமல் விட மாட்டார்கள் போல் இருக்கிறது. இ.டூவில் ஏதோ சொன்னாங்க, படிச்சிப் பார்த்தப் பொழுது, அதில் தமிழ் மக்களைக் குறித்து இல்லை என்பது தெரிந்தது. ஆனால் மறுநாள் சொன்னது பற்றிக் கொண்டது. கண்டனம், ஆர்பாட்டம், உருவ பொம்மை கொளுத்துதல், செருப்படி மற்றும் அதன் நீட்சியாய் கோர்ட் கேஸ் என்றதும், கண்ணீரும் கம்பலையுமாய் மன்னிப்பு கேட்டுக் கொண்டார்.

சரிதான் கதை முடிந்தது என்றுப் பார்த்தால் விதி சும்மா விடவில்லை. ரிடையர் நடிகை சுஹாசினி வீறுக் கொண்டு எழுந்து, பெண்ணீயவாதியாய் காட்டிக் கொள்ள குஷ்பூ சொன்னது தப்பில்லை என்று சொல்லிவிட்டார். அவர்தான் ஏதோ சொல்கிறார் என்றால் இந்த குஷ்பூ அது முடிஞ்சிப் போன கதை என்று மேடையிலேயே எடுத்து சொல்லி மேட்டரை குளோஸ் செஞ்சியிருக்கலாம் இல்லையா? ஒருவேளை சுஹாசினிக்கும் அரசியல் ஆர்வம் வந்துவிட்டதா?

வலைப்பதிவில் இருந்து, பெண்களை மதித்து தெய்வமாய் வழிப்படும் சத்தியராஜ், மேடை பேச்சாளர் வெற்றி கொண்டான் வரை, தமிழ் பெண்களை அப்படி பேசியது தவறு என்று கண்டித்திருக்கிறார்கள். நடிகை உளறினால் அவர்களுடைய பூர்வீகம் அலசப்படும், இன்று குஷ்பூவுடன் சுஹாசினியை எவ்வளவு கீழ்தரமாய் பேசுகிறார்கள்?

ஆனா ஒண்ணுங்க, இந்த பிரச்சனையை ஊதி ஊதி பெருசாக்கினால் நாளைக்கு குஷ்பூ எலக்ஷன்ல நின்று எம்.எல்.ஏ பிறகு
மந்திரி பிறகு... நினைச்சாலே சிரிப்பாய் இருக்கிறது. சொல்ல முடியாது, கோவிலே கட்டியவர்கள் ஓட்டு போட மாட்டார்களா என்ன? தன்னைப் பாடாய் படுத்துகிறார்கள் என்று இன்னும் கொஞ்சம் நன்றாய் அழுது ஓட்டு வாங்குவது வெகு சுலபம். இன்று குஷ்பூவை அசிங்கமாய் திட்டும் காகிதபுலிகள் அன்றைக்கு எப்படி நடந்துக் கொள்வார்கள்?

அரசியலில் "வாய்மையே வெல்லும் " என்று பெரிய தலைவர் சொல்லியிருக்கார். அதாவது வாயும், மையும் வெல்லும்.

அதாவது மைக்( வாய்) பிடித்து பேசுபவர்களைப் பற்றிய செய்திகள்( மை) பத்திரிக்கைகளில் தொடர்ந்து வந்தால் வெற்றி.