கண் படும் விஷயம்.

கண் படும் விஷயம்.

கேரளா பாணி திருமணங்கள் நம் ஊரில் அதிகமாகி வருகிறது. வரதட்சணை வேண்டாம் என்று சொல்லப்பட்டாலும் அதிக ஆடம்பர திருமணங்கள் அதிகமாகி வருகின்றன. இருக்கிறதோ இல்லையோ, சொந்தங்கள் நட்புகளை செய்வதைப் பார்த்து நாமும் செய்தே ஆக வேண்டும் என்ற மனப்பான்மை. ஒன்றிரண்டு நாள் வைபவத்துக்கு லட்ச கணக்கில் பணம் செலவழித்து பெருமையைக் காட்டிக் கொண்டாலும், அதைப் பார்த்தவர்கள் யாரும் போற்ற போவதில்லை, ஞாபகத்திலும் வைத்துக் கொள்ளப் போவதில்லை.

பணம் இருந்தவர்கள் காட்டும் பகட்டு, இருக்கு என்று காட்டிக்கிறார்கள், அலட்டிக் கொள்கிறார்கள் என்று பொறாமை பேச்சு
எழும். இல்லாதவர்கள் செய்தால், கடன் வாங்கியாவது செய்யணுமா, இவர்கள் பவுஷ¥ தெரியாதா என்று கேலி பேசுவார்கள்.
இல்லை என்றால் "இது என்ன கல்யாணம் இதை விட நாங்க சூப்பரா செஞ்சோம்" என்று வெட்டி பெருமை பேசப்படும்.

நான் கல்யாணம் முடிந்து அஸ்ஸாமுக்கு போனப் பொழுது, கிட்டதட்ட ஓரே வயது செட். கேரளா, ஆந்திரா, வட இந்தியர்கள் இன்ஜியர் மாப்பிள்ளைக்கு அள்ளிக் கொடுத்திருந்தார்கள். எனக்கு அப்படி எதுவும் தரவில்லை :-) சமையல் பாத்திரம் தவிர அனைத்தும் என் கணவர் வாங்கியது.

எங்கள் வீட்டு கல்யாணங்கள், வெகு எளிமையாகத்தான் இருக்கும். வரதட்சணை, பேரம், நகை, சீர் என்ற பேச்சுகள் அபூர்வம். அப்படி பேசினால் பெண் தர மாட்டார்கள். வசதி இருந்தாலும் பின்னால் தருவார்களே தவிர கல்யாணத்தின் பொழுது அடக்கி வாசிப்பார்கள். அதற்கு பிறகும் தீபாவளி, பொங்கல் லொட்டு லொசுக்கு சீர் கதையெல்லாம் கிடையாது. பிள்ளை பேறின் பொழுது, மாப்பிள்ளை ஆஸ்பத்திரி செலவை ஏற்றுக் கொள்ளுவது சகஜமான விஷயம்.

என் கல்யாணத்தில் தாலி காலை ஆறரை மணிக்கு கட்டியப்பிறகு, மத்தியானம் பன்னிரண்டு மணி வாக்கில் அத்தை, என் அம்மாவிடம் "நீங்கள் போட்ட நகைகளை, எங்க வீட்டு பெரியவர்கள் (பெண்கள்) பார்க்க ஆசைப்படுகிறார்கள், கொஞ்சம் உஷாவிடம் அனுப்புங்கள்" என்று கேட்டுக் கொண்டார். அவருக்கு என் பெற்றோர் என்ன போட போட்டிருக்கிறார்கள் என்று அதுவரை தெரியாது. இதை பலரிடம் சொன்னப் பொழுது யாரும் நம்பவில்லை. எங்கள் கல்யாணம் பெற்றோர் பார்த்து செய்து வைத்தது என்பதை இங்கு சொல்லிக் கொள்ள விரும்புகிறேன் :-)

தன் பெற்றோரை பாடாய் படுத்தி நடத்தப்படும் கல்யாணம் எந்த பெண்ணுக்கு புகுந்த வீட்டின் மீது பிரியத்தை ஏற்படுத்தும்? பொதுவாய் கல்யாண பேச்சுகளிலும் பிறர் தலையீடும் இருக்காது. இப்பொழுது வெளிநாட்டு மாப்பிள்ளைகள் அமைவதால், எனக்கு தந்த எவர்சில்வர் பாத்திரங்கள் கூட வாங்க தேவையில்லை. பகட்டு பட்டு புடைவைகளும் தேவையில்லை என்கிறார்கள்.

அதனால் பெண் பிறந்துவிட்டால், பெரியதாய் சேர்த்து வைப்பது கவலைப்படுவது எல்லாம் இல்லை. பொறாமையாய் இருக்கிறதா?