அ.தியை, ரூபி, மோகம் மற்றும் ஆண்மனம்

இங்கு இந்தக் கூத்து அதிகம் எடுப்பட்டவில்லை. கூட்டம் வழக்கப்படி நகைக்கடையில் அம்முகிறது. என்ன நாளைக்கு வாங்கப்போவதை இன்னைக்கு வாங்கப் போறாங்க. அது என்ன நாளைக்கு என்று யோசிக்கிறீர்களா? நாளைக்கு முதல் தேதி, மளிகை சாமான் வாங்கிப்
போட மாட்டீங்களா? அதுப்போல தாங்க, துபாய்வாசிகள் நகை வாங்குவது என்பது மளிகை சாமான் வாங்குவதுப் போல!

விலை அதிகமாக ஆக, வாங்கும் கூட்டமும் அதிகமாகிக் கொண்டே போகிறது.. பவுன் விலை பத்தாயிரத்தை எட்டிடுமாம். அதனால் இப்பவே முடிந்த மட்டும் வாங்கிப் போட போகிறார்களாம். என்னத்த சொல்ல? பெண்கள் மட்டுமே வாங்குகிறார்கள். போடுகிறார்கள் என்று
தப்பாய் நினைக்காதீர்கள். கண்ணில் படும் சகோதரர்கள் கையில், கழுத்தில், விரலில் தங்கம், வைரம் மற்றும் நவரத்தின கற்கள் மின்னுகின்றன.

போன வருஷம், சென்னையில் இருந்தேனா? பக்கத்து வீட்டில் காலை நாலு மணிக்கு விளக்கு வெளிச்சம்.. ஏதோ ஊருக்கு கீருக்கு போகிறார்கள் என்று நினைத்தால் குளித்து முழுகி, அழகாய் புருஷனும், மனைவியுமாய் ஆறு மணிக்கு திறக்கப் போகிற நகைக்கடை வாசலில் ஐந்து மணிக்குப் போய் வரிசையில் நின்று, நான்கு நாட்களுக்கு முன்பு அட்வான்சு கொடுத்து, தேர்ந்தெடுத்து வைத்திருந்த நகையை வாங்கி வந்தார்கள். ஆஹா, மனைவியின் ஆசையை நிறைவேற்றும் இவர் அல்லவா, மனதினுக்கினிய காதல் கணவன் என்று பெரூமூச்சு விடும்பொழுது, உண்மையை எடுத்து சொன்னார்கள்.

என்னத்தான் மனைவியின் நகை மோகத்தை கிண்டல் அடித்தாலும், அதிகாலை இருட்டில் அவளை தனியாய் அனுப்ப இயலுமா? அடுத்து, வீட்டில் ஐஸ்வர்யம் பொங்கினால், நமக்கு நல்லதுதானே என்ற எண்ணமும் சேர, விருப்பமில்லாததுப் போல நடித்து, இந்த நாளுக்காக காத்திருந்து, அதற்காக மாதாமாதம் பணம் எடுத்து வைக்கும் பதிகளைப் பற்றி விவரமாய் எடுத்து சொன்னார்கள்.

இந்த முறை நடிகை சீதா, வைரம் வாங்குங்கள். ஐஸ்வர்யம் பொங்கும் என்று தொலைக்காட்சியில் சொல்லிக் கொண்டு இருந்தார். எங்க வீட்டில் கூட, "மோகம்" விளம்பரத்தைப் பார்த்து நல்லா இருக்கு இல்லே என்று கமெண்ட் வந்தது. நான் யதார்த்தமாய்,
"இல்லைங்க, இந்தியாவில் விட இங்க ரூபி சூப்பரா இருக்கு" என்றேன்.

"நான் விளம்பரத்தை சொன்னேன்" பட் என்று பதில் வந்தது.

போன வாரம், இரண்டொரு முறை கிண்டலாய் அக்ஷயதிதியைக்கு நகை வாங்கிக் கொள்கிறாயா என்றுக் கேட்டதும், பெண்ணீய கொள்கை ஞாபகம் வர முறைத்தேன். ஆனால் இரண்டு நாளுக்கு முன்பு தமாசில் ( புகழ் பெற்ற நகைக்கடை) விண்டோ ஷாப்பிங்கில் ரூபி வளையல் ஒன்று கண்ணைப் பறித்தது. ஒன்றின் விலை 2500 திராம்ஸ்- ரூபாய் மதிப்புக்கு 11 ஆல் பெருக்கிக் கொள்ளுங்கள். வளையல் என்றால் இரண்டு வாங்க வேண்டும்.

போன வாரம் நகை வேணுமா என்றுக் கேட்டதும், மோகம் விளம்பரமும் நினைவில் , மெல்ல "நல்லா இருக்கு இல்லே" என்றேன்.

"ஆமாம்! நல்லா இருக்கு" என்று சொல்லிவிட்டு வேக வேகமாய் நடையைக் கட்டினார்.

பொம்பளைங்க மனசு பொம்பளைக்குதான் தெரியும் என்பது சுத்த பேத்தல். மனைவியின் மனம் தெள்ள தெளிவாய் கணவனுக்குப் புரியும். பாருங்க, வளையல் நல்லா இருக்கு என்று சொன்ன மறுகணம், ஆள் அங்கு இல்லை. ஹ¥ம்!