தேர்தல்- 2060 சரித்திரம் திரும்புமா?

அவருக்கு வயது எண்பதுக்கு மேல் இருக்கலாம். ஒல்லியான, ஆனால் உறுதியான உடல் கட்டு. கையில் ஊன்றுக்கோலுடன் நடந்துக் கொண்டு இருந்தார். வாய் எதையோ முணுமுணுத்துக் கொண்டு இருந்தது. ஏதோ கோபம், யார் மீதோ எரிச்சல். அவ்வப்பொழுது காறி உழிந்துக் கொண்டே நடந்துக் கொண்டிருந்தார்.

நகரத்தின் விளிம்பில் இருந்து மெல்ல காட்டு பகுதி ஆரம்பித்தது. காடு வளர்ப்பு திட்டத்தின் படி, மழைக்காடுகள் நாடெங்கும் அரசால் வளர்க்கப்படுகின்றன. தானியங்கி இயந்திரங்கள் நுழைவு பகுதியில் நின்றிருந்தன. கையில் கட்டியிருந்த, கடிகாரம் போன்ற கருவியில் ஒரு பட்டனைத் தட்டியதும் உள்ளே நுழைய அனுமதிக் கிடைத்தது.

மாலை நேரம், சுகமாய் காற்று வீசியது. அதையெல்லாம் கவனிக்காமல், அவர் நடை வேகத்தைக் கூட்டியது.

"எதுவுமே செய்ய முடியவில்லை" ஆத்திரத்தில் அவர் வாய் முணுமுணுத்தது.

"வாழ்ந்தது போதும், நான் சாகப் போகிறேன்"

அவர் திடுக்கிட்டார். குரல் வந்த திசையைப் பார்த்தால், புதருக்கு பின்னால் ஒருவன் முழங்காலில் முகத்தைப் புதைத்துக் கொண்டு உட்கார்ந்திருந்தான்.

மெல்ல அவன் அருகில் சென்றதும், காலடி ஓசைக் கேட்டு அவன் நிமிர்ந்தான்.

"அட நீங்க நடிகர் ஜிஜா இல்லை?" கிழவர் கேட்டதும், "போ, போ இங்கிருந்து" அவன் கத்தினான்.

பெரியவர் ஒன்றும் பேசாமல் பேசாமல் நின்றார். அழுவதால் அவன் முதுகு குலுங்கியது. பெரியவர் அவன் அருகில் உட்கார்ந்து, "நானும் சாகத்தான் வந்தேன். வாழ்க்கை அலுத்துவிட்டது" என்றார் மெல்ல.

அவனிடமிருந்து எந்த பதிலும் வரவில்லை.

"தனிமை, வயதும் ஆகிவிட்டது. வாழ்ந்ததுப் போதும் என்று இந்த காட்டில் கடைசியில் இருக்கும் மலையின் மீது இருந்து குதித்து உயிரை விடலாம் என்று வந்தேன். ஜிஜா, உனக்கோ சிறு வயது, புகழின் உச்சியில் இருக்கிறாய். நீ என்று அழைக்கலாம் இல்லையா?"

அவன் பதில் சொல்லவில்லை.

"சரி வா, நடந்துக்கொண்டே பேசலாம். காட்டின் கடைசி பகுதிக்குப் போக வேண்டும். இருட்டினால் பாதை தெரியாது. உள்ளே நுழைய தானியங்கி காவலை ஏமாற்ற, நான் இருக்குமிடம் பிறருக்கு தெரியாமல் இருக்க செய்தவை நான்கு மணி நேரத்தில் செயலிழந்து விடும்" எழுந்தார்.

ஜிஜாவும் எழுந்தவாறு, "என்னுடைய செயலிழப்பு இருபத்தி நான்கு மணி நேரம் இருக்கும்" என்றான்.

"அவ்வளவு பணத்திற்கு நான் எங்குப் போவேன்" என்று கிழவர் முணங்கினார். இருவரும் பேசாமல் நடந்தனர். ஜிஜா, கையில் கட்டியிருந்த கடிக்காரத்தைத் திருகினான். சின்ன திரை ஒன்று வெளியே வந்து விரிந்தது.

" ஓட்டுப் போட மறக்காதீர்கள். ஓட்டளிப்பது உங்கள் கடமை" என்ற செய்தி ஒலித்தது.

" தயவு செய்து அதை நிறுத்துகிறாயா?"

"தேர்தல்... ஹூம்! அந்த காலத்தில் எப்படி கோலாகலமாய் இருக்கும் தெரியுமா? என் தாத்தா காலத்தில். தேர்தல் அறிவித்த நாள் முதல் இரண்டு மாதத்திற்கு எல்லாரும் இதைப் பற்றியே பேசிக் கொண்டு இருப்போம். ஆனால் இப்பொழுது என்ன வாழ்க்கை இது? எல்லாமே இயந்திரமயம். கட்சி, தேர்தல் இவைகளில் யாருக்கும் அதிகம் விருப்பமில்லை. தேர்தலில் நிற்க ஆட்களை தேடுப் பிடிக்கிறார்கள். பேசாமல், நாடாளவும் இயந்திரத்தைக் கொண்டு வந்துவிடலாம்"

"மனிதர்களே இயந்திரம் போல அல்லவா வாழ்கிறார்கள்?" ஜிஜாவின் குரல் மெல்ல ஒலித்தது.

"ஆம், வாழ்க்கையே இயந்திரமயமாகிவிட்டது. பெயர் முதற்கொண்டு அரசின் ஆணைப்படி. சுதந்திரம் என்ற வார்த்தையே அர்த்தமிழந்துவிட்டது"

"சுதந்திரம்... அது கிடைக்காமல்தான் நான் தற்கொலை செய்துக் கொள்ள வந்தேன். என் விருப்பப்படி எதுவுமே செய்ய முடியவில்லை" என்றான் ஜிஜா.

கிழவர் பேசாமல் நடந்தார். ஜிஜா ஏதோ சொல்ல ஆரம்பிக்க, அவனை பேசாதே என்று சைகை செய்தார்.

சில நிமிடங்களுக்கு பிறகு, " ஒரு சின்ன யோசனை. முதலில் நான் பேசுவதைக் கேள். நடுவில் பேசாதே" என்றார் கிழவர்.

"ஜிஜா, நீ நாடறிந்த முகம். இன்னும் தேர்தலுக்கு ஒரு வாரம் இருக்கிறது. இன்றிரவே ஒரு கட்சி ஆரம்பிக்கப் போவதாய், அனைத்து ஊடகங்களிலும் செய்தி குடு. மக்கள் அனைவரும் பலவித சட்டங்களால் கட்டுண்டுக் கிடக்கிறார்கள். மக்களுக்கு சுதந்திர வாழ்க்கை அளிப்பேன் என்ற உறுதி மொழி கொடு போதும். நீ வெல்வது உறுதியாகிவிடும்"

ஜிஜா, சுவாரசியம் இல்லாமல் உச்சுக் கொட்டியவன், " ஆமாம் இப்படி அறிவித்தால், மறு நிமிடம் நான் கைது செய்யபப்டுவேன்" என்றான்.

கிழவர், " தெரியும். சுதந்திர வாழ்க்கை தருகிறேன் என்ற உறுதிமொழியை கடைசி நிமிடத்தில்
அறிவிக்க வேண்டும். இப்பொழுது அறிவித்தால், நாட்டின் நலத்திற்கு ஊறு விளைவிக்கிறாய் என்று உன் கட்சி தடைப்படலாம், நீ கைது செய்யப்படலாம். அரசு இயந்திரம் யோசித்து முடிவெடுப்பதற்கு முன்பு, ஆட்சியை நீ பிடிக்க வேண்டும் .உன்னிடம் பணமும், புகழும் இருக்கலாம். ஆனால் செல்வாக்கு, அரசியல் பலம் என்பது வேறு. நீ என்ன நினைக்கிறாயோ அதை செய்யலாம். எல்லாரும் உனக்கு அடிப்பணிந்து நிற்பார்கள். அரசியல் பலம் என்ன என்பதை நான் அறிவேன்" அவர் குரல் ஓங்கி ஒலித்தது.

ஜிஜா முகம் யோசனையில் ஆழ்ந்தது.

"ஜிஜா, எனக்கு ஓரே பிரச்னை. வாழ்க்கை அலுத்துவிட்டது. உனக்கோ சுதந்திரமாய் இருக்க முடியவில்லை என்ற குறை. நம் இருவர் பிரச்சனையும் தீர ஓரே வழி, நீ தேர்தலில் நிற்பது. கட்சி. தேர்தல், ஆட்சி அனைத்திலும் உதவ நான் இருக்கிறேன்" கிழவர் சொல்ல, சொல்ல ஜிஜா முகம் மாற ஆரம்பித்தது.

ஜிஜா, "கேட்பதற்கு சுவாரசியமாய் இருக்கிறது" என்றவன், "நீங்களே தேர்தலில் நின்றிருக்கலாமே" என்றதும், கிழவர், " வயதாகிவிட்டது. மேலும் எனக்கு யார் ஓட்டளிப்பார்கள். நீயோ பிரபலமான முகம்.. சரித்திரம் படித்ததில்லையா?" என்றவர், மேலும் சொல்ல ஆரம்பித்தார்.

ஜிஜா, "பார்க்கலாம், வாழ்க்கையில் நான் தேடிய த்ரில் கிடைக்கும்போல இருக்கிறது. நான் ரெடி. ஆமாம் உங்கள் பெயர் என்ன?"

"நிதி " என்றார் கிழவர்