ஒரு நடிகையின் வாழ்க்கை

அவர் ஒரு நடிகை, நடிகை என்றால் அன்றைய காலக்கட்டங்களில் வில்லனின் ஆள்,
கிளப் டான்சர், காமடியனின் காதலி என்று நடித்தவர். அவர் என் உறவினர் வசித்த
அடுக்குமாடி குடியிருப்பில் கீழ் தளத்தில் காற்று வெளிச்சமும் இல்லாத சிங்கிள் பெட் ரூம், சதுரத்தை பதினைந்து வருட பழசு, செகண்ட் ஹாண்டாய் வாங்கி குடியேறினார். ஒரு மாதிரி சாமியாரிணி போல, கழுத்தில் துளசி மாலை, ருத்ராட்ச மாலைகள், நெற்றியில் வீபூதி, அகல குங்குமம் மற்றும் எப்பொழுதும் கசங்கிய காவி புடைவை. யாருடனும் ஒரு வார்த்தைக் கூட பேசமாட்டார். வயது அறுபது பிளஸ்.

ஆனால் அவர் குடிவந்ததும் சிலர் ஆட்சேபணை கிளப்பினார்கள். நான் அங்கு
சென்ற அன்று, அசோசியேஷன் மீட்டிங் நடந்து முடிந்திருந்தது.

உறவினள் சொன்ன இரண்டு விஷயங்களை என்னை மிகவும் பாதித்தன. அந்தம்மாள்
அங்கு இருக்ககூடாது என்று சொன்னவர்களைப் பார்த்து, ஆமாம் நான் தே.. யாதான்? அதுக்காக தானே என்னை விரட்ட பாக்குறீங்க? அதெல்லாம் வேண்டாம் என்றுதானே வயசான காலத்தில் இந்த குச்சில் வந்து இருக்கிறேன் என்று தடாலடியாய் சொல்லிவிட்டு, வீட்டை காலி பண்ண மாட்டேன் என்று சொல்லிவிட்டார்.

என் உறவினர் சொன்ன மிக முக்கிய மேட்டர்- அந்தம்மாளை கரித்துக் கொட்டியவர்கள் அனைவரும் ஆண்கள், பெண்களிடமிருந்து எந்த எதிர்ப்பும் வரவில்லை என்றாள் :-)

இச்சம்பவத்தை முன்பே "தோழியர்"கூட்டு பதிவில் எழுதியிருந்தேன். அதை ஒரு
சிறுக்கதையாக்கி, கோவை ஞானி அவர்கள் நடத்தும், பெண்களுக்கான சிறுக்கதைப்
போட்டிக்கு அனுப்பினேன். தேர்ந்தெடுக்கப்பட்ட சிறுக்கதைகளை புத்தகமாகவும்
வெளியிட்டு இருக்கிறார்கள். நேற்று தபாலில் கிடைக்க பெற்ற அத் தொகுப்பில் என்னுடைய " அந்த ஒரு சொல்" சிறுக்கதையும் இடம் பெற்று இருக்கிறது. மற்ற விவரங்கள் தெரியவில்லை.