Blogger's meeting with Kamal

பறவைப் பார்வை என்கிற கிரேன் பார்வையில் பார்ப்போம். கசகசவென்று பேச்சு சத்தம். யார் எவர் என்று புரிப்படவில்லை. மேலும் பதிவாளர்கள் ஒவ்வொருவராய் உள்ளே நுழைந்துக் கொண்டு இருக்கிறார்கள். செல்பேசி, காமிரா போன்றவை அனுமதியில்லை என்று டோக்கன் கொடுத்து எடுத்திவைக்கப்படுகின்றன. டேப் ரிகார்டர் போன்ற கருவிகள் உள்ளனவா என்று விசாரிக்கப்பட்டும், மெடல் டிடக்டர் மூலமும் முற்றிலுமாய் சோதனை செய்து, தடவியும் பார்த்து அறைக்குள் அனுமதிக்கப்படுகின்றனர். இங்கு நடக்கும் விஷயங்களை வெளியில் பேசவோ, எழுதவோ மாட்டேன் என்று எழுதப்பட்ட தாளில் கையெழுத்து இடுகின்றனர். அத்தனை ரகசியம்!

நடுநாயகமாய் அடக்கத்தின் உருவமாய் அமர்ந்திருக்கிறார் கமலஹாசன். கொஞ்சம் பின்னால் கே.எஸ். ஆர். தொண்டையை செறுமிக் கொண்டு கமல் பேச ஆரம்பிக்கும் பொழுது, ஒரு இளமையான தாத்தா தன் சிஷ்யகோடிகளுடன் உள்ளே நுழைகிறார்.

"ஐங்கார்சமூகத்தின் சார்ப்பாய் இந்த மலர் மாலையை திரு. கமலஹாசனுக்கு அணிவிக்கிறேன்" என்றதும், சிஷ்யகோடிகள் கைத்தட்டுகிறார்கள் "தென்கலை அய்யங்கார்
சார்ப்பாய்" திருத்துகிறது ஒரு குரல். மாலை அணிவிக்க உதவியவரைப் பார்த்து, ஒரு குரல் ''எங்க உங்க தோஸ்த் கி.அ? என்கிறது. "தெரியவில்லை. ஆனால் நான் அவனில்லை" என்கிறார் அவர்.

"நான் அவனில்லை, சமீபத்தில் எழுபதில் வந்தப்படம். ஜெமினி ஒன்பது வேஷத்தில் நடித்திருப்பார்"

"ஆமாம், நவராத்திரியில் சிவாஜி ஒன்பது வேஷத்துல, சிட்டிசன்ல எங்க தல ஒன்பது வேஷத்துலையும்தான் நடிச்சிருக்கார். இதே நான் அவனில்லை ரீ மேக்ல ஜீவன்
அதே ஒன்பது வேஷத்துல பூந்துவெளையாடியிருப்பார். ஆனா இந்த படத்துல கமல் ஓரே பிரேம்ல பல வேடத்துல வராரே? சூப்பர் சார்"

"இதெல்லாம் எல்லாருக்கும் தெரியுஞ்ச கதைத்தானே? ஆனா 1913ல் ரோல்ப் ரஸ்லி இருபத்தி ஏழு வேடத்துல நடிச்சிருக்கார். 1924ல ...." அவர் தொடர கூட்டம் அமைதியாகிறது.

கமல் வாயை திறந்து திறந்து மூடுகிறார். "வந்து... எஸ்... நாம் இதைப் பற்றி பிறகு பேசுவோம்" என்கிறார்.

"என்னத்த படம், பிரமாண்டம்னு சொல்லிட்டு அபத்தமாய் இருக்கு. தாரே ஜமீன் பர் அமிர்கான் எடுத்தாரே அது படம்" பக்கத்தில் இருந்தவரிடம் மெல்ல சொல்கிறார்.

"ஹிஹி! அந்த படம் தமிழ்ல எடுத்தா கமல் எந்த வேஷத்துல நடிச்சிருப்பார்?"

" ஜோக்கூ? சுகன்யா இந்த படத்த பார்த்தா சந்தோஷப்பட்டிருக்கும். ஒரு முப்பது வருஷத்துக்கு முன்னாடி வயநாட்டு தம்பன் னு ஒரு மலையாளப்படம். அதுல
கமல் பல வேஷத்துல வருவாரு. முன்னூறு வருஷ கெழவனா வருவாரு பாரு. சூப்பர். ஆனா அதையே எல்லா படத்துலை செஞ்சிக்கிட்டு இருந்தா எப்படி?"

"நேத்து தசாவதாரம் டிவிடில பார்த்துட்டு , கடைசி சீன்ல .... பெருமாளே" கை எடுத்து கும்பிடுகிறார்.

"ரீச்சர் பிரசண்ட்"

"உடம்பு பரவாயில்லையா?"

"டிவிடியா?" கமலும், கே. எஸ். ஆரும் அலறுகின்றனர்.

"ஆமாம், என்.டி. ராமாராவ்காரு விஷ்ணு, ராமர், கிருஷ்ணன்னு நடிச்ச படம்"

"சார் படம் சூப்பர் ஹிட். அமெரிக்கவுல மட்டும் நூறு கோடி வசூல். ஜாக்கிசானே புகழ்ந்து தள்ளிட்டார்" வாழ்த்துக்கள் மழையாய் கொட்டுகின்றன.

"அந்த ஆளு பத்து நிமிஷம் படம் பார்த்தேன்னாரு. மல்லிகா பொண்ண பார்த்து ஜொல்லுவிட்டுட்டு, ஹாங்காங்க்கு பிளேன் ஏறிட்டாரு. ஆனா ஒண்ணு மட்டும் சொல்லுதேன், புஷ்க்கு படம் கிடம் காட்டூனீக, அந்த ஆளு போகிறபோக்கில் கடுப்பாயி, மிச்சம் மீதி இருக்கிற பாம்மை நம்ம தலையில போட்டுட போறாரு"

"மிஸ்டர் கமல், பன்னிரெண்டாவது நூற்றாண்டு கதை. அப்பொழுது ஏசுவும், அல்லாவும் இந்தியாவில் நுழையாத காலம்... என்று ஆரம்பிக்கிறீர்கள். ஆனா கிறிஸ்துவம்
முதலாம் நூற்றாண்டிலும், இஸ்லாம் ஆறாம் நூற்றாண்டிலும் இந்தியாவில் மேற்கு கடற்கரையில் கால் ஊன்றிவிட்டது"

கமல் வழக்கப்படி பேச முஸ்தீபு செய்வதற்குள், " இப்படிதான் லிங்கத்தையும் ஆவுடையாரையும் நீங்கள் தவறாய் குணா, காதலா காதலாவில் காட்டியுள்ளீர்கள்.
யோ....."

"யாருடே அது, இந்த பின்நவீனத்துவ வாதிகளை உள்ளே விட்டது? ஆரம்பிச்சுட்டாங்கையா "

அண்ணாச்சி, இவுரூ ஆன்மீக பதிவர்.

ஆன்மீகமா, பின்ன ஏன்டே குறி சொல் எல்லாம் சொல்லுதாரு?

அதற்குள் கமல், ஆரம்ப தகராற்றை கடந்து, " படத்தில் சில தவறுகள் இருக்கலாம். நடிப்பும், கதை வசனம் என்னுடையது. மத்த விஷயங்களை நீங்கள் இயக்குனரைத்தான்
கேட்க வேண்டும்"

ஏதோ யோசனையில் இருந்த கே. எஸ். ஆர், திடுக்கிட்டு, "ஆமாம் நாந்தான் டைரக்டர்" என்றார்.

இப்பொழுது நான் உங்களை அழைத்தது, என் அடுத்த படத்தைப் பற்றி பேச

மர்மயோகியா சார்?

இல்லை மர்மயோகிக்கு பின்னால், மருதநாயகத்துக்கு முன்னால் எடுக்கப் போகிற படம். இந்த படத்தில் என்ன விசேஷம் என்றால்.... ரவிகுமாரைப் பார்த்து கண் அசைக்கிறார். எதிரில் இருந்த திரையில் ஒரு ஸ்டில் வருகிறது.

கமல் குரல் ஒலிக்கிறது. "தெருவில் ஒரு கார். முன் பக்கம் ரெண்டு பேர், பின் சீட்டில் மூணு. தெருவில் பூட் பாலிஷ் போடும் சிறுவன், காலை நீட்டிய ஆண். குடையுடன் பேசிக் கொண்டே போகும் சிறுமியும் தாயும். நீங்க பார்க்கிற அத்தனை காரெக்டரும் நான் தான். படத்தில் வரும் அனைத்து வேஷமும் நானே போடுவதாக ஒரு ஸ்கிரிப்டும், ஆண்கள் காரக்டர் மட்டும் என்று இன்னொரு ஸ்கிரிப்டும் ரெடி. புரொட்யூசரும் ரெடி இன்னும் டைரக்டர் பார்த்து ஒண்ணை ஓ.கே சொல்லணும். என்ன டைரக்டர் சார்''

ஓ.கே சார். டைரக்ஷன் நான் தான்

அந்தா ஓரமாய் காலை தூக்குகிற நாயி, காக்கா இதை விட்டுட்டீங்களே

சூப்பர் படம் சூப்பர் ஹிட்டுதான்

"ஏந்.. காரு, சைக்கிள், பில்டிங் வேஷமும் போடலாமே? இதுவரை யாருமே போட்டிருக்க மாட்டாங்க"

"சார்.....'' மிக பெரியதாய் உற்சாகத்துடன் ஒலிக்கிறது ஒரு குரல். "அங்க பாருங்க. தெருவுல போஸ்ட் பாக்ஸ்! பாப்பா, ரெண்டாம்ப்பூ படிக்கிறச்சே, போஸ்ட் பாக்ஸ் வேஷம் போட்டு, ப்ர்ஸ்ட் பிரைஸ் வாங்கிச்சு சார்"

"அப்படியா? அப்ப நீங்க எங்க மேக்கப் டீம்ல சேர்ந்துடுங்க. பர்ஸ்ட் ஷெட்டியூல் டேட் முடிவானதும் நீங்க வந்துடணும்"

அவரால் தன் காதையே நம்ப முடியவில்லை. "தாங்ஸ் கமல் சார். அத்தனை பெருமையும் என் ஓய்ப்க்குதான். இப்படிதான் நடராஜ்ஜை கிருஷ்ணன் ஆக்கியதும், மாயூரமே கொண்டாடிச்ச்சு சார்" பாவம் அதீத ஆனந்தத்தில் வார்த்தைகள் குளறின.

"சிவன் விஷ்ணுவாய் உருமாற்றம். சரித்திர சான்று இருக்கா?" ஆனால் பதில் சொல்லும் நிலையில் அந்த பதிவாளர் இல்லை.

"இப்படிப்பட்ட மேக்கப் ஆளுங்க நமக்கு தேவை" ரவிகுமாரிடம் மெல்ல சொன்னார் கமல். ஆமாம் சார் என்றார் ரவிகுமார்.

"ஒன் மினிட் மிஸ்டர் கமல்'' ஒரு பெண் குரல் ஓங்கி ஒலித்தது. "இந்த படத்துல மனோரமா மேடத்தை மேக்கப்ல கொஞ்சும் குமரியாக்கி உங்களுக்கு ஹீரோயின் ஆக்கலாமே?"

"வந்துட்டாங்கையா பெண்ணீயவாதிங்க. இந்த எளவை எல்லாம் எவன் பார்க்கிறது?"

"தோடா, கிழவனுங்க கொமரனாய் வேஷம் கட்டலாம். அதை பார்க்கிறது இல்லே?" கோவமாய் ஒலித்தது இன்னொரு பெண் குரல்.

பாவம் கமல், முகத்தை சாதாரணமாய் வைத்துக் கொள்ள சிரமப்பட்டு, " ஆ... நல்ல ஐடியா. யோசிக்கலாம். டைரக்டர் என்ன சொல்கிறார்ன்னும் பார்க்கலாம்"

"நல்ல ஐடியா சார். மத்த காரக்டருக்கு யூத்தா போட்டுடலாம்"

"தசாவதாரத்தில் மல்லிகா ஷெராவத்தைப் போட்டா மாதிரி, ஹாலிவுட் ஹாட் லிஸ்ட் என்கிட்ட இருக்கு சார்" வழிந்தது ஜொள்ளு.

"கமல், நானும் விக் எண்ட் ஜொள்ளுன்னு ஒரு லிஸ்ட் வெச்சிருக்கேன்"

கமல் கை கடிகாரத்தில் நேரம் பார்கிறார். "அனைவருக்கும் நன்றி. உங்களின் ஆக்கப்பூர்வமான யோசனைகளுக்கு நன்றி. உங்களில் சிலரை படம் முழுக்க பயன்
படுத்திக் கொள்ள விரும்புகிறேன். நன்றி" என்று கையைக் கூப்புகிறார்.

கமலும், ரவிகுமாரும் வெளியே வந்து ஓரே காரில் ஏறுகிறார்கள். கேட்டை தாண்டியவுடன் எதிரில் இருந்த பொட்டி கடையில் தினசரிகளின் விளம்பர தாள்கள் தொங்கின்றன. அனைத்திலும் கொட்டை எழுத்தில் ஓரே செய்தி. பார்த்ததும் திடுக்கின்றன இருவர் முகமும். செய்தி இதுதான்.

"கமலின் மேக்கப் சாதனை. அடுத்த படத்தில் இளம் நாயகியாய் கமலுடன் நடிக்கிறார் ஆச்சி. இட்லிவடை என்ற இணையதளம் ஒன்றில் படங்களுடன், விவரமான செய்திகள் சுட சுட வெளியாகியிருக்கிறது''

பி.கு தசாவதாரம் சென்ற ஞாயிறு அன்றுப் பார்த்துவிட்டேன். புண்பட்ட மனதை பதிவிட்டு ஆற்றிக் கொண்டேன்.



''