இது குழந்தைங்க சமாசாரம் மட்டுமில்லே

போன வார குமுதம். நடிகை பூமிகா, அழகான கொழுக் மொழுக் என்றிருந்த ஒன்றரை வயதுக்குட்பட்ட குழந்தையை மடியில் வைத்துக் கொண்டு ஒரு விழாவில் அமர்ந்திருந்தார். அக்குழந்தைக்கும் அவருக்கும் உள்ள சம்மந்தம். அக்குழந்தையுடன் நடிக்கப் போகிறாராம். இது நல்ல உத்தி இல்லையா? புது முகம் என்று குழந்தை மிரளாது. காமிரா வட்டத்தைத்
தாண்டி நிற்கும் அம்மாவைப் பார்த்து கையை நீட்டி அழாது. அவ்வழுகையின் ஒலி பார்ப்பவர்கள் காதில் விழாவிட்டாலும், கண்ணில் நீர் தழும்ப மிரளும், கதறும்
குழந்தைகளை எத்தனை படங்களில் பார்த்திருக்கிறோம்! எம்.ஜி.ஆர் படங்களில், அவர் தன் நாயகியை கையாளுவதுப் போல குழந்தைகளுடன் நடிப்பார். பத்மினி நடித்த ஒரு படம், காலமிது காலமிது பாட்டு வருமே, அதில் பேபி ராணி தத்தக்கா பித்தக்கா என்று அழகாய் ஓடி பத்மினியைக் கட்டிக் கொள்ளும். ஆனால் பிறகு கேள்விபட்ட விஷயம், பார்க்க சிறுகுழந்தையாய் தெரிந்தாலும், பேபி ராணியின் உருவம் சிறியது. அதனால் அப்படத்தில் நடிக்கும்பொழுது மூன்று வயதுக்கு மேல் இருக்கும் என்றார்கள்.

கிருஷ்ண ஜெய்ந்தி சமயம், ரிமோட் உதவியால் சானல்களை தாண்டிக் கொண்டிருந்தப் பொழுது, ஜி குஜராத்தி சேனலில் கண்ணில் பட்டது. நல்லா யோசிக்கிறாங்கப்பா
என்று தலையில் அடித்துக் கொள்ளலாம் என்று இருந்தது. அழகான குழந்தை, தலையில் சிறு கிரீடம் அதில் மயிர் பீலி, பளபள உடை, கழுத்தில் முத்துமாலை என்று அலங்கரித்து, ஒரு கூடையில் இட்டு ஆயர்பாடி நந்தகோபனைப் போன்ற காஸ்ட்யூமில் ஒரு ஆள், குழந்தை இருந்த கூடையை தூக்கி தலையில் வைத்துக் கொண்டு வலம் வந்துக் கொண்டு இருந்தார். மேடையில் '' ஒரு ஆனந்தா"கையில் செல்போனுடன் கிருஷ்ணபஜனையில் கூட்டமே அவருடன் அலறிக் கொண்டு இருந்தது. எல்லாரும் நின்றுக்கொண்டு ஆனந்த கூத்தாடிக் கொண்டு இருக்க, குழந்தை கிருஷ்ணன் இருந்த கூடையுடன் அந்த ஆள் கூட்டத்தில் புகுந்து வர எல்லாரும் குழந்தையை தொட்டு கும்பிட்டுக் கொண்டு இருந்தனர். குழந்தையோ அலறிக் கொண்டு கூடையில் இருந்து குதிக்க முயற்சிக்க, நந்தகோபன், தலைக்கு மேல் இருந்த கூடையை ஒரு கையில் பிடித்து பேலன்ஸ் செய்துக் கொண்டும், இன்னொரு கையில் குழந்தையின் இரு கால்களை சேர்த்து கூடையின் இன்னொரு முனையில் கெட்டியாய் பிடித்துக் கொண்டு இருந்தார். குழந்தை சுற்றி முற்றிப் பார்த்து பெற்றவளை தேடுகிறது. கீழே குதிக்க குனிகிறது. அதற்கு மேல் என்னால் பார்க்க முடியாமல், சேனலை மாற்றிவிட்டேன்.

இதை தட்டும்பொழுது தோன்றிய விஷயம், முதுகுவலி நிவாரணி மூவ், விக்ஸ், பாங்க் ஆப் இந்தியா, சென்னை சில்க்ஸ், கோல்ட் வின்னர் எண்ணை, கோகுல் சந்தன பவுடர் என்று அனைத்து விளம்பரங்களிலும் சிறுபிள்ளைகளை பயன்படுத்துகிறார்களே இது சரியா?