கடல்புரத்தில்

கடல்புரத்தில் - வண்ண நிலவன் எழுதியது. முதன் பதிப்பின் முன்னுரையில் 1977ம் வருடம் என்று போட்டு இருக்கிறது. அதனால்அதற்கு முன்பே எழுதியிருக்க வேண்டும்.

எந்த வித சூடான சமாசாரங்களோ, விருவிருப்பிற்கு என்று சேர்த்த விஷயங்களோ இல்லாமல், சாதாரண கத்தோலிக்க கிறிஸ்துவ மீனவ மக்களின் வாழ்க்கையை பதிவு செய்துள்ளார், அவர்களின் பேச்சு மொழியிலேயே! ஆனால் அதுவே படிக்க மிக சுவாரசியமாய் உள்ளது.

செபஸ்தி (செபாஸ்டியனாக இருக்க வேண்டும்) தன்னை படிக்க வைத்து, வேலைக்கு அனுப்பிய தந்தையின் முகத்தை ஏறிட்டுப் பார்க்காமல், மீனவ வாழ்க்கைக்கு முற்று புள்ளி வைத்துவிட்டு, வாத்தியார் வேலைப் பார்க்கும் தன்னுடன் வந்துவிடுமாறு தங்கையை, தாயையும் அழைப்பதுடன் கதைதொடங்குகிறது.

பல தலைமுறையாய் தொடரும் மீனவ வாழ்க்கை. கடலும், மணல்பரப்பும், மீன் பிடிப்பு, மீன் கருவாட்டு வாசம் இதைவிட்டு ஒரு மீனவனால் எப்படி முடியும்? கடல் அவன் ரத்தத்துடன் கலந்தது அல்லவா? குழந்தை பிறந்ததும் தாய்பாலுக்கு முன்பு, கரிக்கும் கடல் நீரை அல்லவா
விட்டு வளர்த்தார்கள்!

செபஸ்தியின் தங்கை பிலோமி, கதையின் நாயகி. அவளுக்கு சாமிதாஸ் மீதான காதல், எல்லை மீறினாலும், கைக்கூடவில்லை. அதையும் யதார்த்தமாய் ஏற்றுக் கொள்கிறாள். அவள் அண்ணனுக்கும் தோழி ரஞ்சியின் காதலும் நிறைவேறவில்லை. காரணம் கதையில் சொல்லப்படவில்லை. பிலோமியின் தாய்க்கு வாத்தியுடனான நட்பு எப்படிபட்டது என்பதை கதையில் பூடகமாய் சொல்லப்படுகிறது. குடி போதையில் தடுக்கிவிழுந்து தாய் உயிரிழக்க, வாத்தியுடன் பிலோமிக்கு நட்பு ஏற்படுகிறது. கதையின் இறுதியில் நாளை பிலோமி வாத்தி வீட்டுக்கே போய்விட போகிறாள் என்ற வரிகள், இருவருக்குமான உறவு எப்படிப்பட்டது என்பதை முடிவெடுப்பது வாசகரின் ஊகத்திற்கே எழுத்தாளர் விட்டுவிடுகிறார்.

இப்படி பல முரண்பாடுகளை ஊர் சும்மா பேசி விட்டு விடுகிறது. ஆனால் அங்கும் பொருளாதாரமே எல்லாம் என்பதை எழுத்தாளர் மிக நுட்பமாய் கதையில் சொல்கிறார். ஓரே சாதி என்றாலும், பிலோமி, சாமிதாஸ் காதல் நிறைவேறாமல் போவதற்கு காரணம் பிலோமி
வல்லம் வலிப்பவனின் மகள். சாமிதாஸ், லாஞ்சு முதலாளி. எல்லாவற்றையும் பொறுத்து போகும் மக்கள், வயிற்றில் அடிப்படும்பொழுது வெகுண்டு எழுகிறார்கள். துடுப்பு போடும் வல்லங்களை பின்னுக்கு தள்ளி லாஞ்சுகள் மீன்களை அள்ளி வருகின்றன. அதில் ஏற்படும் பகை கதை நெடுக வருகிறது.

நாவலின் நாயகி பிலோமி என்றாலும், கடலோசையே மாந்தர்களின் உணர்வுகளை சொல்கிறது. கடலும், அலை ஓசைகளும், மணற்பரப்பும், தென்னை மரங்களும், நீர் பறவைகளும், பரதவ குடியிருப்புகளும், பண்டியல் என்கிற கிறிஸ்துமஸ் கொண்டாட்டங்களும், கதாப்பாத்திரங்களும் ஒரு திரைப்படம் பார்த்த உணர்வை தருகிறது "கடல்புரத்தில்"

நாவலை அனுப்பி வைத்த கிழக்கு பதிப்பகத்துக்கு நன்றி.