உன் கணவர் உன்னை நேசிக்கிறாரா - ஏகாம்பரிக்கு ஒரு கடிதம்

அன்புள்ள ஏகாம்பரி நலமா?
நீ ஏன் பதிவு இடுவதில்லை என்று உன் ஓரே தோழியான என்னை கேட்கிறார்கள். பிலோக்கோ போபியாவுக்கு சிகிச்சை தந்த மருத்துவர், உங்களை பதிவு பக்கமே போகாதே என்றா சொன்னார்? நடுவில் நட்சத்திரமாய் டால் அடித்தாய். போன வருடம் என்றைக்கு தமிழ் வருஷப்பிறப்பு கொண்டாடுவது என்ற குழப்பத்தில் ஆழ்ந்துப் போனவள், இரண்டே
முறை மட்டுமே தலையைக் காட்டினாய், பிறகு அட்ரசே காணோமே?

நிற்க, இணைய உலகத்தில் நடக்கும் சிலவற்றை உன்னிடமாவது பகிர்ந்துக் கொண்டு என் சோகத்தை தீர்த்துக் கொள்கிறேன். ஒருமுறை, வீட்டு வேலைகளில் உதவும் உன் கணவர் கூட அவர்கள் வீட்டார் வந்துவிட்டார், சைலண்டாய் ஒதுங்கிப் போய்விடுவார் என்று சொல்லியிருக்கிறாய். ஆனால் எழுத்தாளர் ச. தமிழ்ச்செல்வன் ஆண்களுக்கான சமையல் குறிப்புக்கள் என்ற புத்தகமே போட்டிருக்காராம். பேச்சிலர் சமையலுக்கு குறிப்புகள் என்று என்னைப் போல நினைக்காதே!


இரண்டு நாட்களுக்கு முன்பு அவர் போட்ட பதிவு படிக்க ஆரம்பித்ததும் முதலில் வந்த சந்தேகம் அது ஏதாவது அறிவியல் புனைக்கதையா என்று! இல்லை என்று தெரிந்ததும் முழுவதையும் படித்து விட்டு நெஞ்சம் இனிக்கவில்லை. ஆனால் கண்கள் பனித்தன. பதிவும் எதைக் குறித்து தெரியுமா, ஆண்டாண்டு காலமாய் சமையலறையில் வேகும் பெண்களுக்கு விடுதலை தந்துவிட்டு, இனி ஆண்கள் சமைக்க வேண்டும் என்று கூறியிருந்தார்.


பின்னுட்டங்களில் இணைய உலக ஆண் சமூகமே கண்ணீர் வடித்துவிட்டு, இனி நாங்களும் சோறு வடித்து மனைவிக்குப் போடுவோம் என்று சூள் உரைத்திருக்கிறார்கள். அம்மாவையும், மனைவியும் நேசிப்பவன் சமைக்க மாட்டேன் என்று சொல்லமாட்டான் என்று வேறு போட்டிருந்ததா நானும் அதை டெஸ்ட் செய்துவிடலாம் என்று நினைத்து, மாலை வீட்டுக்கு திரும்பி என் கணவரிடம், சூடாய் காபியை தந்துவிட்டு, "என்னை நீங்கள் நேசிக்கீறீர்களா" என்றுத்தான் கேட்டேன்.


பாவம், சூடான காபியை சட்டை மீது கொட்டிக் கொண்டு விட்டார். சோபா வீணாகிவிடும் என்று துணி எடுத்து துடைத்துவிட்டு, மீண்டும் அந்த கேள்வியை சிறிது மாற்றி ," ஏங்க நீங்க உங்கம்மாவையும், என்னையும் நேசிக்கிறீர்களா? என்று கேட்டதும், மனுஷன் முகம் பூவாய் மலர்ந்துவிட்டது .

"இது என்ன கேள்வி எங்க அம்மா எவ்வளவு படாத பாடு பட்டு என்னை வளர்த்தார்கள்? அவங்களை நேசிக்காமல், அப்கோர்ஸ் உன்னையும் தான் நேசிக்காமல் இருக்க முடியுமா " என்று உணர்ச்சிவசப்பட்டு கூறினார்.

"நீங்க எங்க ரெண்டு பேரையும் நேசிப்பது உண்மை என்றால், எங்களுக்கு நீங்க சமைச்சிப் போட்டணும். அதுவும் ஒரு மாசம், நானும் சங்கடமான சமையலை விட்டு முழு மூச்சுடன் இலக்கியம் படைக்கப் போகிறேன் என்றேன்.

ஏகாம்பரி! அவர் நம்ம கமல் மாதிரி வாயை திறந்து திறந்து மூடினார். ஏதோ சொல்ல வந்தார். பிறகு தொண்டையை கனைத்துக் கொண்டார்.

"இந்த மாதிரி எல்லாம் பிளாக்குல தானே படிச்சே?" என்று சரியாய் கேட்டதும், நான் தலையை ஆட்டினேன்.

"இந்த மேட்டரில் ஒரு தப்பு இருக்கு. உங்க ரெண்டு பேரையும் நான் சமமாதான் நேசிக்கிறேன். ஆனா எங்கம்மாவுக்கு நான் சமைச்சிப் போட்டா உனக்கு கோபம் வரும். உன்னை உட்கார வைத்து ஒரு மாசம் சமைச்சிப் போட்டா எங்கம்மா வருத்தப்படுவாங்க. நான் சொல்ரேன்னு நினைக்காதே, கண்டதையும் படிச்சி மனச போட்டு குழப்பிக்காதே என்றார். நான் விடவில்லை. ''நீங்கள் என்னை நேசிப்பது உண்மை என்றால் சமையலறைக்கு வந்தே ஆக வேண்டும்" என்று கண்கள் கலங்க கூறினேன்.

சிறிது நேரம் யோசித்தவர், " வேணா இந்த ஞாயிற்று கிழமை நான் சமைக்கிறேன்" என்றார். எங்கள் பேச்சுகளை சுவாரசியமாய் கேட்டுக் கொண்டு தங்களுக்குள் கண் ஜாடை செய்துக்கொண்டு இருந்த பிள்ளை செல்வங்கள், " உவே, உன் சமையலை யார் சாப்பிடுவாங்க? அதுக்கு அம்மா சமையலே பெட்டர்" என்றான் அருமை மகன்.

மகளோ, " அம்மா, போன வருஷம் பாட்டிக்கு உடம்பு சரியில்லைன்னு நாலு நாளு ஊருக்குப் போனியே, அப்ப அப்பா அடிச்ச கூத்து மறந்துப் போச்சா? பாத்திரங்கள் எல்லாம் கருப்பாக்கி, அடுப்பை தீவட்டி மாதிரி எரிய விட்டு, குக்கரோட காப்பர் பாட்டமே கழண்டுப் போயி வேற வாங்குனியே. அப்புறம் தாளிச்ச எண்ணை எல்லாம் சுவரு, தரை எல்லா தெளிச்சி, கிச்சனையே நாஸ்டி பண்ணிட்டாருன்னு புலம்பிக்கிட்டு இருந்தியே. வேணாம், உன் டிச்சை நீயே தோண்டிக்காதே" என்றாள்.

இவை எல்லாம் கேட்டு எனக்கு பயமாகிவிட்டது. முதுகு வலி வேறு பாடாய் படுத்துகிறது. இந்த மனுஷன் சமையல் செய்கிறேன் பேர்வழி என்று கிச்சனை நாற அடித்தால், அந்த எக்ஸ்ட்ரா வேலை எல்லாம் வேலைக்கார பொண்ணு செய்யுமா? பிறகு நான் தானே சுத்தம் செய்ய வேண்டும் என்ற ஞானோதயம் ஏற்பட நான் மேற்கொண்டு பேசாமல் இருந்துவிட்டேன்.

என் மகளோ, இதெல்லாம் ஆரம்பத்துலேயே அப்பாவ டிரெயின் செய்து இருக்கணும். இவ்வளவு வருடம் கழிச்சி சொன்னா அதெல்லாம் செய்ய அவருக்கு உடம்பு வணங்காது என்றாள். அவள் சொன்னத்தைக் கேட்டதும், கொஞ்சம் மனசுக்கு திருப்தியானது. ஏதோ அவளாவது புத்தியாய் பிழைத்துக் கொள்ளட்டும் !


இப்பொழுது புரிகிறதா இணையம் நம் வாழ்வில் எப்படி எல்லாம் விளையாடுகிறது என்று? ஒரு மாசம், அவர் சமைத்துப் போட நான் சமையறை பக்கமே போகாமல் சாப்பிட்டுக் கொண்டிருந்தால் எப்படி இருக்கும் என்று மனசு முழுக்க ஏக்கமாய் ஆகிவிட்டது. ஹூம், ஆண்கள் கொடுத்து வைத்தவர்கள்

யார் ஒரு மாதம் மனைவிக்கு சமைத்துப் போட போகிறார்கள், ஒரு மாதம் சமையல் செய்த மகானுபவனின் மனைவியின் சோகக்கதைகள் போன்றவை வந்தால் உனக்கு தெரியப்படுத்துகிறேன். அதற்குள் நீயும் உன் கணவர் உன்னை நேசிக்கிறாரா என்று மட்டும் சோதனை செய்துப் பார்!
இப்படிக்கு,
உன் அன்பு தோழி.


எழுத்தாளினி ஏகாம்பரியின் அறிமுகம் இல்லாதவர்கள் "பிலாக்கோ போபியா மற்றும் நட்சத்திரம் ஆகிய லிங்கைக் கிளிக்கிப் படிக்கவும்